NISMA për Kosovën ka mbajtur tubim elektoral në Suharekë, në të cilin është bërë edhe prezantimi i kandidatëve për deputetë në Kuvend të Kosovës, nga NISMA për Kosovën në Suharekë.
Kryetari i Kryesisë së NISMA për Kosovën, Fatmir Limaj, në komunën e Suharekës tha se, në tubimin e hapjes së fushatës në Prishtinë të gjithë skeptikëve u tregoi se në Kosovë po vjen një frymë e re.
“Ne nga Prishtina po vazhdojmë për të ju treguar të gjithëve se Nisma po vjen, si në Skenderaj, Mitrovice, dje në Ferizaj, ku u tregua që Nisma është një fuqi në atë vend, dhe të gjithë po mbesin gojëhapur, sepse Nisma nuk po del në televizione për tu reklamuar, por po shkon tek qytetarët dhe po bisedon me ta, sepse populli nuk blihet me para”, ka thënë Limaj.
“Kosova më shumë se kurrë sot ka nevojë për një lidership që nuk premton, por punon, sepse edhe në Therandë u premtua shumë po nuk u bë asgjë, përkundrazi vetëm u shkatërrua, për këtë votoni Nismën, votoni numrin 59, sepse ne mbajmë fjalën”, tha Limaj.
Kryetari i Këshillit Kombëtar i NISMA për Kosovën, Jakup Krasniqi para qytetarëve të Suharekës tha se, sikur të kishim bindjen se kandidatët për Kryeministër janë të mirë dhe dinë të qeverisin me vendin, ne nuk do kishim dalur fare, mirëpo ata nuk janë të denjë për ta qeverisur vendin.
Krasniqi ka thënë se Nisma vlerëson shumë lirinë e fituar, vlerëson shumë pavarësinë e fituar, por jemi të bindur që nuk është bërë shumë për vendin dhe mirëqenien e qytetarit, andaj ne ju drejtohemi të gjithëve që t’i bashkangjiten Nismës, sepse Nisma është e të gjithë qytetarëve të vendit.