Kryetari i Degës së AAK-së, Lulëzim Kabashi, ende nuk e ka publikuar analizën për 100 ditëshin e “Qeverisë Muja III”. Edhe pse ka kaluar më shumë se një muaj nga koha kur pat premtuar se AAK, do të dalë me një analizë për (mos)punën e “Qeverisë Muja III”, Kabashi deri më tash nuk ka publikuar asgjë.
Kryetari i Komunës së Prizrenit, Ramadan Muja, ndërkohë në tubimin publik me qytetarët për afër një ore ka raportuar dje për punën që është bërë në gjashtë mujorin e parë të mandatit të tretë. Ai në këtë debat ka folë 52 minuta për të gjitha punët që janë realizuar. Ndërkaq, në këtë debat nuk ka marrë pjesë nënkryetari i tij, Lulëzim Kabashi,njëherësh kryetar i Degës së AAK-së në Prizren.
Burimet e “PrizrenPress”-it bëjnë të ditur se Kabashi i ka ftohur raportet me kryetarin Ramadan Muja,për shkak goditjes që ia ka bërë PDK-ja gjatë fushatës zgjedhore.
“Ekziston një ftohje të raportit mes Kabashit dhe Mujës, por jo për shkak qeverisjes së Komunës, por për shkak goditjes që PDK-ja ia bëri gjatë fushatës elektorale AAK-së në Prizren, duke ia marrë anëtarët dhe kryetarët e nëndegëve”, tregon një burim brenda AAK-së.
Sipas të njëjtit burim (mos)vazhdimi i koalicionit në mes AAK-së dhe PDK-së në Prizren varet edhe nga zhvillimet politike në Prishtinë.
“Koalicioni i Prizrenit është bërë në Prishtinë dhe vetëm atje mund të prishet. Luli nuk mund ta prishë koalicionin edhe pse është kryetar i Degës së AAK-së”.
AAK-ja në Prizren për shkak të këtyre zhvillimeve politike në zgjedhjet e 8 qershorit ka dalë partia që ka marrë më së paku vota në Prizren. Ky subjekt politik nuk ka arritë të fitojë së paku një vend në Parlamentin e Kosovës./PrizrenPress.com/