I akuzuari për rrezikim të trafikut publik, Zenel Halilaj, e ka pranuar fajësinë, në seancën e së martës, në Gjykatën Themelore në Gjakovë, dega në Malishevë.
Pas leximit të aktakuzës nga prokurori Bajram Kryeziu, i akuzuari Halilaj, ka thënë se e ndien veten fajtor, duke kërkuar nga gjykata që ndaj tij të shqiptohet një dënim sa më i butë, për arsye se sipas tij, këtë vepër e ka kryer nga pakujdesia.
Ai gjithashtu deklaroi se në ditën kritike të dëmtuarin e kishte dërguar në institucion shëndetësor, i kishte ofruar edhe ndihmë financiare dhe se ishte paraqitur vullnetarisht në polici për ta paraqitur rastin që të vazhdohet tutje me procedurat e tjera, raporton “Betimi për Drejtësi”.
Prokurori Kryeziu, nuk e ka kundërshtuar pranimin e fajësisë nga i akuzuari Halilaj.
Ndërsa, i dëmtuari Gazmend Thaqi, deklaroi se nuk i bashkëngjitet ndjekjes penale, dhe se kompensimin e dëmit e ka realizuar në kontest civil, një javë më parë pranë kësaj gjykate.
Gjykatësi i çështjes, Lulzim Paçarizi, ka aprovuar pranimin e fajësisë nga ana e të akuzuarit, ndërsa atë e ka njoftuar se shpallja e aktgjykimit do të bëhet më 7 shkurt 2019, në ora 15:00.
Ndryshe, më 27 prill 2017, Prokuroria Themelore në Gjakovë, ka ngritur aktakuzë ndaj të akuzuarit, Zenel Halilaj, i cili akuzohet se më 3 shtator 2016, rreth orës 19:30, në rrugën regjionale Prishtinë-Malishevë, në fshatin Terpezë, derisa ka qenë duke e drejtuar automjetin e tij, nga pakujdesia ka vepruar në kundërshtim me Ligjin mbi Rregullat e Trafikut Rrugor, e ku ka rrezikuar jetën e të dëmtuarit, Gazmend Thaqi.
Në aktakuzë thuhet se i akuzuari me të arritur në fshatin Terpezë, Komuna e Malishevës, duke mos e përshtatur shpejtësinë e lëvizjes, kushteve dhe rrethanave të rrugës, në pamundësi për tu ndalur, me pjesën ballore të krahut të majtë të automjetit e ka goditur këmbësorin Gazmend Thaqi, i cili ishte duke e kaluar rrugën nga ana e majtë në të djathtë, pasi zbret nga “Taxi”.
Po ashtu, sipas aktakuzës, pas goditjes nga automjeti, këmbësori Gazmend Thaqi, sipas ekspertizës mjekoligjore pëson lëndime të rënda trupore.