Në kuadër të aktiviteteve “ Java e Shëndetësisë Kosovë-Turqi”, të enjten, një delegacion i mjekëve nga Turqia kanë vizituar Spitalin e Prizrenit ”Prim. Dr. Daut Mustafa”.
Delegacioni është udhëhequr nga dr. Öner Güner, drejtor gjeneral për marrëdhënie ndërkombëtare dhe BE në Ministrinë e Shëndetësisë së Turqisë.
“Ne jemi në Kosovë për të dhënë ndihmën tonë në fushën e mjekësisë. Një ekip i mjekëve nga Turqia dhe mjekët e QKUK-së, në repartin e Kardiologjisë në Prishtinë, për herë të parë në Kosovë me suksese kanë kryer një operacion te një foshnje 5 muajshe”, – tha dr. Öner Güner. Ai ka shprehur interesimin dhe gatishmërinë që në të ardhmen operacione të tilla të kryhen edhe në spitalin e Prizrenit, që do të ishin të dobishme si për pacientët, po ashtu edhe për mjekët vendor që do të përfitonin nga përvojat e mjekëve nga Turqia.
Drejtori ekzekutiv i spitalit të Prizrenit, Prof. Ass. Dr. Afrim Avdaj, ka falënderuar mjekët nga Turqia për vizitën e bërë, si dhe shtetin dhe popullin mik të Turqisë për nidhmat e vazhdueshme që kanë dhënë për Kosovën dhe popullin e Kosovës, duke shprehur gatishmërinë e forcimit të bashkëpunimit dhe krijimit të kushteve që iniciativat për operacione të përbashkëta të mjekëve nga Turqia dhe mjekëve të spitalit të Prizrenit të bëhen realitet.