Ministria e Kulturës, Rinisë dhe Sportit planifikon të ndajë 20 mijë euro për renovimin e shtëpisë së Adem Demaçit në Prishtinë për vitin e ardhshëm.
Shuma e caktuar për renovimin e shtëpisë së Demaçit figuron edhe në projekt-buxhetin e Qeverisë për vitin 2019.
Në tetor të këtij viti MKRS ka bërë të ditur se në mesin e aseteve të reja që do të futen në listë të përkohshme të mbrojtjes është përfshirë edhe shtëpia e Demaçit në Prishtinë.
Shtëpia e lindjes e Adem Demaçit, shtëpia e Adem Demaçit, Qendra Tregtare Gërmia – Prishtinë, Selia e Shtabit të Brigadës 121 Komandant Kumanova, Kompleksi Memorial Mujë Krasniqi, Shtëpia Muze e Fadil Vatës, Shtëpia e Kulturës në Runik dhe disa objekte të tjera të cilat tashmë gëzojnë status të ndërtesave/aseteve të mbrojtura sipas Ligjit për Trashëgimi Kulturore”, janë disa asete, që së bashku shtëpinë e Demaçit në Prishtinë kanë hyrë, sipas MKRS në listë të përkohshme të mbrojtjes.
Adem Demaçi, shkrimtar dhe publicist është një nga fytyrat qendrore të rezistencës shqiptare të Kosovës në ish-Jugosllavi.
Për shkak të veprimtarisë politike në mbrojte të të drejtave të shqiptarëve ai u burgos disa herë duke bërë 28 vjet burg në burgjet e ish-Jugosllavisë.
Pas daljes nga burgu e vazhdoi veprimtarinë e tij deri pas çlirimit, duke kontribuar në mënyra të ndryshme.