Kryetari i Komunës së Prizrenit, Ramadan Muja, ia ka dërguar Kuvendit Komunal propozimin që objekti i kinemasë “Lumëbardhi” të shpallet interes i përgjithshëm publik.
Këshilltarët e KK-së pritet që këtë propozim ta shqyrtojnë më 18 shtator, kur do të mbahet mbledhja e organit më të lartë komunal të Prizrenit, shkruan Koha Ditore.
Në propozimin e nënshkruar nga Muja, arsyetimi është se kjo paluajtshmëri duhet të shpallet e interesit të përgjithshëm për arritjen e qëllimit të ligjshëm publik si aktivizimin e kinemasë, ofrimin e aktiviteteve kulturore për qytetarët e Komunës, restaurimin dhe revitalizimin e objekteve në atë zonë, si dhe zgjerimin e rrugës në pajtim me dispozitat ligjore. Për më tepër sqarohet se nëse ky vendim miratohet nga KK-ja atëherë kryetari do të angazhohet për ndalimin e privatizimit nga AKP-ja.
“Në bazë të këtij vendimi kryetari do të iniciojë procedurat e mëtutjeshme për ndaljen e privatizimit të këtij objekti me patundshmëritë nga ana e AKP-së sipas Ligjit për dhënien në shfrytëzim dhe këmbimin e pronës së paluajtshme të Komunës”, thuhet në propozimin e nënshkruar nga Muja.
Nënkryetari i Komunës së Prizrenit, Lulzim Kabashi, ka konfirmuar dërgimin e këtij propozimi te Komiteti për Politikë e Financa në KK dhe ka shfaqur bindjen se ai do të mbështetet edhe nga anëtarët e KK-së së Prizrenit.