Sekretari i Përgjithshëm i Partisë Demokratike të Kosovës, Basri Musmurati, ka thënë për Telegrafin se PDK-ja nuk do të kërkojë dorëheqjen e kryetarit i Prizrenit, Ramadan Muja.
Pavarësisht se i pari i Prizrenit u dënua me dy vjet burgim me kusht, Musmurati tha se, Muja ende nuk ka marrë vendim të formës së prerë nga gjykata.
“Nuk kemi kërkuar dorëheqjen e tij, sepse as me ligj ai nuk obligohet të jap dorëheqje nga pozita e tij. Ne presim që gjykata t’i kryejë punët e saj deri në fund, dhe derisa jemi në këtë gjendje, PDK-ja nuk do të merret me këtë gjë, kërkimin e dorëheqjes, për shkak se kjo çështje i takon kryetarit të Prizrenit”, ka thënë Musmurati për Telegrafin.
Ndryshe, Gjykata Themelore në Prizren dje(të enjten) kishte marrë vendim, që kreu i komunës Ramadan Muja dhe pesë bashkëpunëtorët e tij, të shpallen fajtorë për katër pika të aktakuzës, duke Iu dhënë shqiptimin e dënimit burg me kusht.
Pavarësisht se Muja u shpall fajtor, ai ka deklaruar se nuk do të jap dorëheqje, duke thënë se “do të vazhdojë t’iu shërbejë qytetarëve që i besuan ta udhëheq edhe një mandate”.