DokuFest në bashkëpunim me Kosovo 2.0 organizon punëtorinë për tregime vizuale për të gjithë ata që kanë ndonjë tregim që dëshirojnë ta ndajnë me të tjerët dhe të bëhen pjesë e kësaj punëtorie.
DokuFest ka hapur thirrjen për aplikim për të rinjtë e moshës 16-18 vjeç për garën e rrëfimit më të mirë.
Përmes kësaj platforme, të rinjtë nga Kosova do të pajisen me mjete dhe njohuri të nevojshme në fushën e rrëfimeve vizuale, përmes së cilave ata mund t’i shprehin mendimet dhe shqetësimet e tyre mbi çështjet sociale dhe marrëdhëniet ndëretnike.
Punëtoria do të mbahet me 22 dhe 23 Maj 2014 në Prishtinë dhe më 28 dhe 29 Maj 2014 në Prizren. Punëtoria “Stories we Tell” është komponentë e projektit Fabrika e të drejtave të njeriut.
Bashkëpunimi i komuniteteve etnike përmes rrëfimit të tregimeve është një projekt i financuar nga zyra e Bashkimit Europian në Kosovë dhe implementuar nga DokuFest.
Në këtë mënyrë të rinjtë e Kosovës do të kenë një mundësi për shpërndarjen e një numri të konsiderueshëm të veprave vizuale të natyrës sociale, duke ndikuar kështu në opinionin publik dhe në zhvillimin pozitiv të politikave publike, përmes portalit interaktiv të dizajnuar enkas për këtë platformë.
Për të qenë pjesë e kësaj punëtorie dhe për ta mësuar mënyrën më të mirë të rrëfimit vizual, të rinjtë duhet të aplikojnë përmes emailit në adresën [email protected] deri me 10 Maj 2014.