Serbët e veriut të Kosovës nuk i pranojnë zgjedhjet të cilat i organizojnë autoritetet e Prishtinës, ka deklaruar të premten i ashtuquajturi kryeshef i Qarkut të Mitrovicës, Radenko Nedeljkoviq.
Ai ka thënë për mediet serbe se takimi i udhëheqjes shtetërore me serbët e veriut të Kosovës, të mbajtur të enjten, ka kaluar në një atmosferë korrekte dhe secili i ka paraqitur qëndrimet e veta, por ka përsëritur se serbët e veriut të Kosovës nuk pranojnë heqjen e institucioneve të Serbisë në Kosovë.
“Formimi i institucioneve sipas Marrëveshjes së Brukselit, për Serbinë është e papranueshme, sepse kjo bëhet sipas legjislacionit të Kosovës dhe me këtë shpërbëhen institucionet e shtetit të Serbisë”, ka thënë Nedeljkoviq, duke bërë me dije se serbët e veriut të Kosovës i pranojnë vetëm zgjedhjet që i organizon shteti i Serbisë.
“Ne nuk duam shtet tjetër, dëshirojmë të mbetemi dhe të qëndrojmë në Serbi”, ka thënë Nedeljkoviq.