Gjykata Themelore në Prizren ka caktuar masën e paraburgimit prej një muaji ndaj të pandehurve R.B., dhe A.Sh., për shkak të dyshimit të bazuar se kanë kryer veprën penale “lëndim i rëndë trupor”.
Më 22 qershor, në orët e pasdites në Prizren, të pandehurit në bashkëveprim, i shkaktuan lëndime trupore dhe përkohësisht ia dëmtuan shëndetin të dëmtuarit A.S., thuhet në komunikatën e gjykatës.
Gjykata më tej sqaron, “për shkak të një mosmarrëveshjeje me fqinjin e tyre – të dëmtuarin, e sulmojnë atë fizikisht, i pandehuri R.B., e godet me një thikë (brisk dore), ndërsa i pandehuri A.Sh., e godet me një shufër metalike, mjete këto që mund të shkaktojnë lëndime të rënda trupore ose dëmtim të rëndë të shëndetit në pjesën e abdomenit dhe pjesë tjera të trupit, si pasojë e këtyre veprimeve, të dëmtuarit i shkaktojnë lëndime rënda trupore, sipas raportit mjekësor të emergjencës”.
Gjykata ka marrë parasysh peshën e rëndë të veprës penale dhe ka vlerësuar se me lënien në liri të të pandehurve, të njëjtit mund të arratisen me qëllim të shmangies nga përgjegjësia penale.