Në Prishtinë i filloi punimet Konferenca “Arsimi i të rriturve dhe mësimi gjatë tërë jetës”, organizuar nga Ministria e Arsimit, Ministria e Punës dhe Mirëqenies Sociale dhe Ministria e Kulturës.
Në këtë konferencë katër ditore po trajtohen tema si: Aftësimi profesional dhe punësimi në Kosovë”, “Reformat në arsim dhe mësimi gjatë gjithë jetës”, e të tjera.
Në kuadër të aktiviteteve, “Java e të mësuarit gjatë gjithë jetës”, i filloi punimet konferenca “Arsimi i të rriturve dhe mësimi gjatë tërë jetës”. Agim Berisha, këshilltar i Ministrit në detyrë të Arsimit, Ramë Buja, tha se një ndër fushat më të rëndësishme për të përballuar zhvillimet dinamike, është edukimi i brezave të ri. Ai tha se vizioni i Ministrisë së Arsimit është që të krijohet një sistem gjithëpërfshirës arsimor.
“Qeveria e Kosovës është e ndërgjegjshme për nevojën për të zhvilluar e integruar arsimin profesional dhe atë për të rritur dhe t’u mundësojë të gjithë qytetarëve të përmirësojnë statusin dhe nivelin e shkollimit në shoqërinë kosovare. Për këtë qëllim duhet të identifikohen dhe vlerësohen nevojat arsimore të individëve të organizatave të tregut të punës e të shoqërisë së gjerë në Kosovë”, tha ministri Buja, transmeton RTK.
Drejtori i Departamentit të Rinisë në Ministrinë e Kulturës, Xhevat Bajrami, tha se qëllimi i Ministrisë është që përmes projekteve të përbashkëta në edukimin joformal të krijohen mundësi dhe kushte për zhvillimin e sektorit të rinisë në Kosovë.
“Duke marrë parasysh se rinia e Kosovës përbën pjesën elite të shoqërisë sonë, në numrin e përgjithshëm të popullsisë, si dhe në aspektin e potencialit të saj strategjik për zhvillimin e gjithëmbarshëm të vendit, është nevojë e menjëhershme që këtij potenciali t’i ofrojmë kushte dhe mundësi për të qenë pjesë aktive dhe kontribut dhënëse në të gjitha fushat e zhvillimit të vendit”, tha Bajrami.
Behxhet Gaxhiqi, këshilltar në Ministrinë e Punës dhe Mirëqenies Sociale, tha se vizioni i kësaj Ministrie është që të sigurojë krijimin e mundësive për punësim. Ai tha se janë ngritur kapacitetet e qendrave për aftësim profesional, të cilat ofrojnë mbështetje dhe trajnime cilësore. Konferenca do të vazhdojë punimet deri më 4 dhjetor.