Koalicioni PDK-AAK-Nisma, edhe pse po del si më i votuari në zgjedhjet e parakohshme të 11 qershorit, pothuajse do ta ketë të pamundur ta formojë qeverinë, vetëm me minoritetet, duke përfshirë këtu edhe Listën Serbe.
Mundësia e vetme që i nominuari për kryeministër i PAN, Ramush Haradinaj, të mund ta kalojë në Kuvend formimin e qeverisë, është marrja në koalicion pas-zgjedhor edhe i ndonjë partie tjetër parlamentare, shkruan gazetametro.net.
PAN pritet që t’i ketë 37-38 deputetë, dhe për të arritur minimumin e nevojshëm prej 61 deputetëve, përveç 20 deputetëve të minoriteve, u duhen edhe rreth pesë deputetë të tjerë.
Një mundësi e tillë, është që çelësi i formimit të qeverisë së ardhshme të jetë Behgjet Pacolli, pasi LDK e VV po deklarohen kategorikisht kundër ndonjë koalicioni pas-zgjedhor me PAN.
Gazeta Metro, nga burime të afërta me koalicionin PAN, ka mësuar se kryetari i PDK-së, Kadri Veseli, vetëm se ka vendosur kontaktet e para me Behgjet Pacollin, për të shikuar mundësitë e përfshirjes së këtij të fundit në koalicion pas-zgjedhor.
Siç mësohet, ata nuk janë thelluar në negociata, pasi duhet pritur ende për të parë se sa deputetë do t’i marrë AKR, e cila është në koalicion parazgjedhor me LDK’në dhe Alternativën.
Këto burime i kanë thënë Gazetës Metro, se Veseli dhe Pacolli, e kanë lënë të hapur mundësinë e vazhdimit të bisedave për përfshirjen e AKR-së në koalicion.