Është kthyer në korrigjim dhe rregullim të kërkesëpadisë padia në rastin ku Jehona Berisha po kërkon nga Drejtoria Komunale e Arsimit në Suharekë që e njëjta ta kthehet në vendin e punës.
Të pranishëm në seancë kanë qenë i autorizuari i paditëses avokati Nexhat Elshani si dhe avokati publik i Komunës Qazim Hasanaj, raporton “Betimi për Drejtësi”.
Gjyqtari i çështjes Shaban Zeqiraj ka konstatuar se Gjykatës i është dorëzuar vetëm padia, asnjë provë materiale dhe as dëftespagesa mbi taksat gjyqësore për padi.
Në këto rrethana gjyqtari Zeqiraj e ka shtyrë seancën e sotme për datë 5 maj 2021 në ora 13:30, ndërsa e ka detyruar të autorizuarin e paditëses që në afatin prej 3 ditëve gjykatës t’ia dorëzojë korrigjimin dhe rregullimin e kërkesëpadisë si dhe të gjitha provat materiale dhe dëftespagesën e taksave.
Ndryshe sipas padisë së dorëzuar në Gjykatën Themelore në Prizren, dega në Suharekë paditësja ka kërkuar nga Komuna e Suharekës- Drejtoria Komunale e Arsimit që e njëjta t’ia mundësojë normën e plotë të punës sipas kontratës së punës të nënshkruar nga palët ndërgjygjëse që nga viti 2009. Gjithashtu nga e paditura ka kërkuar që t’ia heqë të gjitha shpenzimet e procedurës për aq sa i cakton gjykata me plotfuqishmërinë e këtij aktgjykimi, nën kërcënimin e ekzekutimit të dhunshëm. /BetimipërDrejtësi