Mbrëmë gazeta Express ka raportuar se një drejtor i komunës së Prizreni është arrestuar nën dyshimin e ngacmimit seksual të një viktime. Këtë gjë nuk e ka mohuar, por as konfirmuar me emër, Policia e Kosovës.
Zyra për Informim e PK’s, ka thënë për Express se një person është arrestuar në Prizren nën dyshimin se ka kryer veprën penale të “trafikimit me qenie njerëzore”, përgjigje që e ka dhënë në pyetjet e Express se a është arrestuar një drejtor i Komunës së Prizrenit, komunë që drejtohet nga Ramdan Muja i PDk’së.
“Me datën 21. 07. 2014 Policia e Kosovës konkretisht Drejtoria për hetimin e trafikimit me qenie njerëzore njësia ne Prizren ka arrestuar një person mashkull / kosovar , me dyshimin se i njëjti ka kryer veprën penale Trafikim me Njerëz/ Shërbime seksuale të viktimës së trafikimit. Te gjitha veprimet e policisë ne ketë rast janë kryer nen autorizimin e prokurorit përkatës ku të njëjtit i është lëshuar vendimi mbi ndalim për 48 orë. Hetimet janë duke vazhduar nga Njësia për hetimin e trafikimit me qenie njerëzore Prizren”, thuhet në përgjigjet e Policisë për Express.
Polica thotë se ky rast ka qene i publikuar ne Raportin 24 orësh te Policisë me datën 22.07.2014 , dhe në këtë raport thuhej: Raport shtesë: “TRAFIKIM ME NJERËZ/SHËRBIME SEKSUALE TË VIKTIMËS SË TRAFIKIMIT: Prizren prill maj 2014- NN. Lidhur me rastin pas hetimeve të zhvilluara nga NJHTQNJ në Prizren është identifikuar dhe arrestuar i dyshuari mashkull K-Turk dhe i njëjti me urdhër të prokurorit dërgohet në mbajtje”.
Express ka provuar që të marr një përgjigje nga Komuna e Prizrenit, por kompetentët për informim të saj nuk u janë përgjigjur thirrjeve të gazetës.