Pas arrestimit të disa të dyshuarve për vjedhje nëpër automjete në Prizren mesnatën e fundit, gjatë ditës së sotme është kryer edhe një bastisje nga policia në lagjen “ Tusus” ku janë gjetur gjësende të vjedhura dhe armë, si dhe është arrestuar edhe një i dyshuar. Policia gjatë mesditës së sotme, ka ndërmarrë një aksion për bastisje te një shtëpie në lagjen “ Tusus”, nën dyshimet për gjësende të vjedhura, me ç’rast ka arrestuar edhe një të dyshuar.
Se si erdhi deri te kjo bastisje, është prononcuar zëdhënësi i policisë rajonale të Prizrenit, Hazir Berisha, i cili tha se mesnatën e fundit, rreth orës 02:30 minuta, policia ka pranuar një informatë e cila bënte me dije se në rrugën “Petrit Bytyçi” po ndodh një vjedhje nga një automjet “Golf II”.
Një patrullë e Njësisë Reaguese ka shkuar në atë lokacion dhe ka marrë informatat e para nga vendi i ngjarjes e më pas ka filluar kërkimi për të dyshuarit. Pas shpërndarjes së informatave përmes rrugëve operative, rreth orës 02:40 minuta, në rrugën “Adem Jashari” është ndaluar një automjet “Golf V” me tre të dyshuar.
Gjatë intervistimit të tyre, është kuptuar edhe për një shtëpi në lagjen “ Tusus” ku mund të ndodhen gjësende të vjedhura, dhe gjatë ditës kemi realizuar këtë aksion në këtë lokacion, tha ai. Gjatë bastisjes që i është bërë shtëpisë dhe objekteve të afërta përreth, janë gjetur gjësende të ndryshme të vjedhura, por edhe tri granata dore dhe një karikator i pistoletës, ndërsa pronari me inicialet G. B është shoqëruar për në polici, ka bërë të ditur zëdhënësi Berisha.
Për largimin e granatave të gjetura, në vendngjarje ka qenë e angazhuar edhe Njësia e Deminimit të FSK-së.