Princesha shqiptare, Elia Zaharia Zogu sot në Prizren ka promovuar librin “Trëndafili i Bardhë”, që i kushtohet Mbretëreshës shqiptare Geraldinë.
Princesha e kurorës, Elia Zaharia Zogu theksoi se eksperienca që përjetoi me këtë libër, është e pa krahasuar deri tani, me asnjë lloj eksperience artistike që ka përjetuar më parë, sepse po i jep mundësinë që të takojë shumë shqiptarë, shumë fëmijë, shumë prindër, shumë gjyshër dhe kjo është një pasuri e jashtëzakonshme.
“Është shumë emocionuese, që përralla ‘Trëndafili i bardhë’, e ka pasur premierën në kryeqytetin e Kosovës, në Prishtinë dhe gjithashtu është një lumturi shumë e madhe që vij në qytetin e Prizrenit, një qytet plot me tradita, një qytet shumë i bukur, një qytet që ka aromë kulture. Për këtë ju përgëzoj shumë, sepse duket që e doni qytetin tuaj, edhe kujdeseni për të, jeni një shembull edhe për ne dhe shumë qytete shqiptare”, tha ajo.
Ajo tha se ka pasur fatin që nga Princi Leka – nipi i Mbretëreshës Geraldinë, është njohur me kujtime familjare dhe gjatë shkrimit të librit ajo ka pasur mundësi të konsultohet me të, kryesisht për karakterin e Mbretëreshës, në mënyrë që libri të jetë në përmbajtje sa më afër botëkuptimit të Mbretëreshës.
Fatlum Hetemi përfaqësues i Shtëpisë botuese “Albas”, tha se ndjen kënaqësi të vërtetë që ndodhet në një mjedis me dashurues të librit “Trëndafili i Bardhë”.
“Një bashkëpunim i këtillë, për në është privilegj, sepse para lexuesit kemi ofruar një libër, i cili në vetvete mbërthen, jo vetëm vlerat e larta letrare, artistike, por vlera të larta edhe historike, e kombëtare”, tha Hamiti.
Libri “Trëndafili i Bardhë” është botuar nga Shtëpia botuese “Albas”, raporton KosovaPress.