Banorët e lagjeve të ndryshme të Prizrenit ankohen për mungesën e trotuareve në rrugët e qytetit. Ilmi Berisha, banor i rrugës “Ismet Jashari -Kumanova”, ankohet për gjendjen aspak të mirë të trotuareve. “Unë si gjysh kam mbesa e nipa në shkollën ‘Mustafa Bakija’ dhe beso aty rreziku është shumë i madh për të pasur aksidente. Të thuash se aty as që ka trotuare tash”, shprehet Berisha. Rreziku edhe më i madh në këtë rrugë është tek shkolla “Lidhja e Prizrenit”. Zyrtarët policorë ndërkaq thonë se ka problem në këtë rrugë, pasi aty po punohet në disa shtëpi të rrënuara. Edhe shoqëria civile ka ngritur zërin për zënien e trotuareve dhe mungesën e qasjes për kalimtarët.
Kanë drojë për fëmijët që shkojnë në shkollë
Për shkak të strukturës ndërtimore, Qendra e Prizrenit dhe vetë qyteti i vjetër kanë probleme shumë të mëdha me trotuare dhe ato tashmë janë bërë brengë për secilin. Banori Avdi Krasniqi shprehet se gjendja e keqe e trotuareve është në të gjitha rrugët e qytetit.”Prizreni me trotuaret që i ka është duke krijuar probleme të rënda për të gjithë këmbë- sorët”, thotë Krasniqi. Sipas tij, problemet më të mëdha i kanë ata që janë të hendikepuar, derisa shprehet se më së shumti kanë drojë për fëmijët që shkojnë në shkollë.
“Rreziku më i madh është për fëmijët”, thotë ai. Ilmi Berisha, banor i rrugës”Ismet Jashari – Kumanova”, shprehet se në këtë rrugë është rrëmujë e vërtetë. Ndërsa, Vesel Gashi, zëdhënës i Policisë Rajonale, pohon se ka telashe me rrugën “Ismet Jashari – Kumanova”, pasi aty po punohet lidhur me disa shtëpi të rrënuara. “Ne çdo ditë jemi në operativë dhe japim dënime për zënien e trotuareve. Jemi të vetëdijshëm që ka probleme të këtilla, por ne jemi aktivisht në aksione për të liruar këto hapësira, por ja problemet vazhdojnë”, pohon Gashi
Mungesa e qasjes në trotuare
Në kuadër të vetëdijesimit për të pasur qasje në trotuare, OJQ-ja “EC Ma Ndryshe” ka organizuar një protestë simbolike, duke vendosur karroca të personave me nevoja të veçanta në rrugë, tek ura e “Arastës”.
“Kërkojmë trotuare për të gjithë” ishte motoja e këtij organizimi në kuadër të projektit “Prizreni, një qytet pa pengesa”. Qëllimi i përgjithshëm i projektit përfshin ngritjen e pjesëmarrjes së personave me nevoja të veçanta dhe të rinjve në projektimin e Prizrenit pa pengesa. Ndërsa Antigona Shestan, nga OPMDK, kërkon që trotuaret të jenë në funksion të këmbë- sorëve.”Ne një kohë të gjatë kemi kërkuar që personat me aftësi të kufizuar të kenë qasje në trotuare. Por, tashmë po e shohim se qasja e këtyre personave është e pamundur, ngase trotuaret janë zaptuar dhe të zëna e po kështu edhe të gjitha mundësitë e qasjes së personave të kësaj kategorie. Andaj, ne sot jemi këtu që të shohin edhe vetë vozitësit se çka do të thotë të kesh pengesa në rrugë”, thotë Shestan. Edhe Remzije Rrahmani shpjegon se forma se si janë zënë trotuaret e bën të pamundshëm lëvizjen e personave me nevoja të veçanta. “Tash pengesat në trotuare janë të shumta dhe kjo po e vështirëson lëvizjen e lirë. Bile shumë pjerrina në trotuare tashmë janë zënë nga lokalet dhe aty po vendosen mallrat, kurse neve po na pamundësohet qasja në pjerrina dhe në trotuare. Prandaj, sot jemi këtu që të themi kundërshtimin tonë dhe njëherësh të kërkojmë të drejtat elementare tona. Tash, kur të gjitha rrugët janë njëdrejtimëshe, rreziku për të lëvizur në rrugë është shumë i madh”, tha ajo.
Këtij rreziku për zënien e trotuareve i frikësohen të gjithë
Studenti Arsim Gashi derisa flet për këtë temë, pohon se Prizreni ndoshta është shembulli më i keq në gjithë Kosovën sa i përket mosçasjes dhe lirimit të trotuareve. “Këtu është vështirë të ecet lirshëm në trotuare. Vlen të përmendet rruga “Ismet Jashari”, pastaj ajo “Remzi Ademaj”, e mos të flasim më për ato në periferi, të cilat kurrë nuk janë të lira. Ajo tek shkollat vërtet është një rrezik permanent”, thotë Gashi. Qytetarja Fahrije Musa tregon se shpesh është e detyruar ta ndërrojë edhe kahun e udhës që mos të kalojë pranë atyre dy shkollave, se vërtet aty ka probleme me trotuaret.
(Kosova Sot)