Togeri i Policisë së Kosovës, Habib Morina në seancën e së premtes ka kërkuar nga trupi gjykues i Gjykatës Themelore në Prizren që të lirohet nga akuza për keqpërdorim të detyrës zyrtare.
Në fjalën e tij përfundimtare, Morina ka thënë se të gjitha veprimet procedurale në natën kritike, ku akuzohet se ka favorizuar një të dyshuar për vjedhje, i ka ndërmarrë në bazë të ligjit dhe kompetencave që ka pasur si udhëheqës i stacionit policor, ndërsa për veprimet që pretendohen si të parregullta, sipas tij, i ka ndërmarrë sipas urdhërave të prokurorit kujdestar.
Tutje Morina ka thënë se në natën kritike, përderisa ai ka qenë i autorizuar të udhëheqë me stacionin policor në Suharekë, në rastin konkret i është përzier në kompetenca një koleg i tij, i cili pa u konsultuar me të u ka dhënë urdhëra policëve në teren, e të cilat kanë qenë në kundërshtim me urdhërat e prokurorit kujdestar dhe ligjin.
Sipas të akuzuarit, organi i akuzës nuk ka arritur të vërtetojë më asnjë provë se ai e ka njohur të dyshuarin Miftar Papaj, për t’i mundësuar favore apo që të tregojnë motivin që ka pasur për ta dëmtuar personin të cilit i është vjedhur çimento.
Ai ka shtuar se sikur organi i akuzës apo Inspektorati Policor i Kosovës, gjatë hetimeve të kishin marrë regjistrat e bisedave telefonike të telefonit kujdestar të Prokurorisë Themelore në Prizren dhe telefonit të tij, do të vërtetohej pretendimi i tij që nga fillimi i rastit se veprimet i ka marrë në konsultim me prokurorin kujdestar.
Sipas tij, gjatë natës kritike dy herë ka biseduar me prokurorin kujdestar, e të cilat do të dëshmoheshin nga regjistrat e bisedave telefonike, por megjithëse ka kërkuar të merren nga operatori i telefonisë, një gjë e tillë nuk është bërë, andaj ka qenë e pamundur që një fakt të tillë ta provojë në gjykatë, pasi që regjistrat e tillë nuk ruhen për periudha të gjata.
Në anën tjetër, prokurori i rastit, Mehdi Sefa ka deklaruar se gjatë rigjykimit të të akuzuarit, me respektimin e vërejtjeve të Gjykatës së Apelit të dhëna në vendimin për rigjykim, duke dëgjuar disa dëshmitarë dhe duke nxjerrë disa prova, me padyshim është vërtetuar se i akuzuari ka kryer veprën penale me të cilën ngarkohet.
Prokurori Sefa ka thënë se i akuzuari as gjatë gjykimit të parë e as gjatë gjykimit të dytë, nuk ka arritur të dëshmojë se ka biseduar me prokurorin kujdestar në natën kritike, andaj ka kërkuar nga trupi gjykues të mos i besojnë një mbrojtjeje të tillë dhe ta dënojnë sipas ligjit.
Trupi gjykues i kryesuar nga gjyqtari Xheladin Osmani, shpalljen e aktgjykimit e ka caktuar për 25 korrik 2018, në ora 9:30.
Ky rast zhvillohet në bazë të aktakuzës së Prokurorisë Themelore në Prizren, të ngritur ndaj Habib Morinës, të cilin e akuzon se duke vepruar në cilësinë e zyrtarit policor, ka keqpërdorur pozitën e tij zyrtare. Sipas aktakuzës, Morina, me qëllim që t’i shkaktojë përfitim material Miftar Papës, ka lejuar që i njëjti të largohet me 39 thasë çimento të vjedhur, me ç’rast i ka shkaktuar dëm Nuhi Bytyqit.
Aktakuza përshkruan se si pala e dëmtuar Nuhi Bytyqi nga Suhareka, kishte lajmëruar rastin në Stacionin Policor të Suharekës, për vjedhjen e 39 thasëve çimento nga oborri i shtëpisë së tij.
Sipas aktakuzës, në të njëjtën kohë, gjatë një pike kontrolli është ndaluar Miftar Papaj, i cili kishte të ngarkuar në automjet 39 thasë çimento, mirëpo rreshteri Morina nuk kishte lejuar që i njëjti të ndalohej dhe të konfiskohej sasia e çimentos së bashku me automjetin.
Përndryshe, i akuzuari Habib Morina, më 29 shtator 2017, ishte shpallur fajtor nga Gjykata Themelore në Prizren për keqpërdorim të pozitës dhe autoritetit zyrtar dhe ishte dënuar me 2 mijë euro gjobë.
Fillimisht, trupi gjykues, i kryesuar nga gjyqtari Xheladin Osmani, të akuzuarin Morina e kishte dënuar me burgim efektiv prej gjashtë muajsh, por me kërkesë të të akuzuarit, dënimi me burgim prej gjashtë muajsh i ishte zëvendësuar me dënim me gjobë prej 2 mijë euro.
Mirëpo, Gjykata e Apelit duke vendosur sipas ankesës së të akuzuarit Morina, më 30.01.2018, ka vendosur që të anulojë aktgjykimin e shkallës së parë dhe rastin ta kthejë në rishqyrtim dhe rivendosje.
Sipas Apelit, arsyetimi i aktgjykimit të shkallës së parë është në kundërshtim me përshkrimin faktik nga dispozitivi i aktakuzës, sepse në aktakuzë nuk flitet për mos zbatim të urdhrave nga togeri Afrim Sylaj, i cili poashtu nuk është dëgjuar për të vërtetuar gjendjen faktike.
Apeli poashtu ka thënë se për të vërtetuar se i akuzuari ka keqpërdorur pozitën e ti zyrtare, duhet të dëshmohet nëse ka pasur apo jo të drejtë të ndërmarrë veprimet që i ka ndërmarrë në natën kritike apo cilat janë veprimet që nuk i ka ndërmarrë, duke i ndërlidhur me dashjen e tij për të përfituar dikush apo për të dëmtuar dikë./betimiperdrejtesi/