Kosovarët si ‘merakli të armëve’, ato i përdorin shpesh edhe në ahengjet familjare, përmes së cilës shprehin ‘gëzimin’ e tyre për një ngjarje të caktuar. E kjo përpos që është dukuri e shpeshtë dhe e kundërligjshme, shumë herë është edhe e rrezikshme. Ka disa raste kur nga të shtënat festive, kanë pësuar edhe me jetë qytetarët e pafajshëm, madje edhe ata që nuk ishin pjesë e ahengjeve, raporton Gazeta Sinjali.
Një rast i tillë ka ndodhur mbrëmë në rrugën ‘Besim Shala’ në Prizren, ku disa të shtëna me armë zjarri kanë shqetësuar banorët e zonës.
Sinjali mëson se njësitë policore kanë dalë në vendin e ngjarjes dhe kanë hasur në të dyshuarin, i cili ka pranuar se ka shtënë me armë.
Bazuar në dëshminë e tij, këtë e ka bërë për të festuar hyrjen në shtëpinë e re, ndërkohë që arma që dyshohet se u përdor në rast, u sekuestrua nga Policia.
64-vjeçari është shoqëruar në stacion policor dhe me urdhër të prokurorit ndaj tij është iniciuar rasti për veprën penale ‘Shkaktim i rrezikut të përgjithshëm’.