Pothuajse çdo ditë raportohen në Polici raste të shumta të vjedhjeve që po ndodhin në biznese e shtëpi gjithandej vendit, duke shkaktuar frikë e pasiguri të madhe për qytetarët. E sidomos periudhën e verës, për shkak të ahengjeve të ndryshme familjare, shumë shtëpi mbesin pa përkujdesje, çka bën që të jenë cak i hajnave, raporton Gazeta Sinjali.
Kështu e kanë pësuar mbrëmë katër familje në fshatin Brestoc të Rahovecit, të cilët ende pa u errur kishin marrë rrugën për në një dasmë, duke lënë shtëpitë e tyre vetëm.
Sinjali mëson se disa persona të panjohur kanë depërtuar brenda shtëpive dhe të njëjtat i kanë demoluar, mirëpo nuk dihet ende se çfarë kanë arritur që të vjedhin.
Pronari i njërës prej shtëpive që ka denoncuar rastin në Polici, ka bërë me dije se një kushëri i tyre ka parë se persona të panjohur janë në shtëpitë e tyre dhe si rrjedhojë ka lëshuar alarmin i cili i ka frikësuar hajnat dhe të njëjtit janë larguar me shpejtësi aty.
Njësitë policore kanë kryer në vendin e ngjarjes të gjitha ekzaminimet që ndihmojnë në zbardhjen e rrethanave të rastit dhe çojnë në identifikimin e personave të dyshuar.
Me urdhër të prokurorit, rasti është cilësuar ‘Vjedhje e rëndë’, teksa vazhdojnë hetimet për gjetjen e të dyshuarve dhe arrestimin e tyre.