Në Gjykatën Themelore të Prizrenit, në seancën e së premtes, ka dhënë dëshminë e tij Xhevat Kabashaj, në rastin ku të akuzuar për keqpërdorim detyre, janë zyrtarët policorë, Flurim Tafolli dhe Rexhep Krasniqi.
Tafolli dhe Krasniqi, akuzohen se e kanë liruar një veturë të vetaksidentuar, megjithëse ajo ka rezultuar e pazhdoganuar, raporton “Betimi për Drejtësi”.
Xhevat Kabashaj, ka dëshmuar në cilësinë e punëtorit të firmës “Xoni”, në Suharekë, e cila është e autorizuar nga policia për bartje të automjeteve të konfiskuara.
Kabashaj, tha se kjo firmë, e ka edhe parcelën ku i vendosin veturat e konfiskuara.
Në pyetjet e prokurores Ervehe Gashi, se me urdhër të kujt ishte liruar vetura, e cila është bartur me mjet, dëshmitari ka thënë se një urdhër të tillë e ka marrë nga i akuzuari Tafolli përmes telefonit.
“Atë ditë kam pasur shumë thirrje telefonike, mirëpo Flurim Tafolli, nëpërmjet telefonit më ka thënë qe ajo veturë të lirohet. Po ashtu edhe Flamur Kuqi, pronari i veturës në fjalë, më ka thirr në telefon dhe më ka thënë që ta lirojë veturën, pasi që sipas tij, ai e kishte kryer punën me policinë”, tha dëshmitari Kabashaj.
Prokurorja Gashi, e ka pyetur dëshmitarin se çka kërkohet të përmbushet atëherë kur kërkohet lirimi i veturës, Kabashaj, tha se në atë moment duhet të jetë nënshkrimi i policit që e liron veturën, e në këtë rast, sipas tij, nuk ka pasur një të tillë.
Kurse, mbrojtësi i të akuzuarit Tafolli, avokati Arben Ramadani, e ka pyetur dëshmitarin Kabashaj, nëse bartjen e automjetit e ka bërë me kërkesë të personave zyrtarë apo privatë.
“Automjetin e kam bartur me kërkesën e pronarit Flamur Kuqi, i cili më është drejtuar nëpërmjet telefonit, si dhe nuk kam pasur kërkesë me shkrim nga ana e policëve për bartjen e tij”, tha dëshmitari Kabashaj.
Ai tha, se edhe me kërkesë të personave privatë mund të bëjnë bartjen e automjeteve.
Ndërkaq, në pyetjen e mbrojtësit të të akuzuarit Rexhep Krasniqi, avokati Asman Hoxha, se me kërkesën e kujt e ka liruar veturën, Kabashaj, tha se atë e ka bërë me kërkesën e të akuzuarit Tafolli.
Seancën e radhës, ku pritet të dëshmojnë edhe dy dëshmitarë të tjerë, gjykatësja Ajser Skenderi, e ka caktuar më 12 mars 2019, nga ora 09:00.
Ndryshe, ky rast zhvillohet në bazë të aktakuzës së Prokurorisë Themelore në Prizren, e ngritur më 26 shkurt 2018, me të cilën të pandehurit akuzohen se duke vepruar në cilësinë e zyrtarëve policorë, kanë liruar një veturë të vetaksidentuar, megjithëse e njëjta ka rezultuar e pazhdoganuar.
Sipas aktakuzës, në automjetin e liruar nga të pandehurit kanë qenë të vendosura tabelat e regjistrimit të një automjeti tjetër, andaj sipas organit të akuzës, ata është dashur ta dërgojnë automjetin në terminal doganor, e jo ta lirojnë.