Vendimi i Organit Shqyrtues të Prokurimit për ta pezulluar fushatën e informimit të votuesve mund ta dëmtojë procesin zgjedhor, kanë thënë anëtarë të Komisionit Qendror të Zgjedhjeve, shkruan sot Koha Ditore.
Ky vendim i Gjykatës së Tenderëve erdhi pasi kompania “Entermedia” deponoi një ankesë në OSHP përmes së cilës pretendohen shkeljet ligjore të KQZ-së në këtë aktivitet të prokurimit. Me të pranuar ankesën, OSHP-ja ka pezulluar kontratën të cilën e mban operatori MDA.
Anëtarë të KQZ-së kanë ngritur shqetësimet se pezullimi i fushatës së informimit të votuesve, për shkak të procedurave tenderuese, mund të ndikojë në përsëritjen e numrit prej 105 mijë apo 12 për qind të fletëvotimeve të pavlefshme, sa ishin në zgjedhjet e fundit lokale, pasi që ka munguar informimi.
Nga Gjykata e Tenderëve kanë thënë se për këtë çështje do të vendosin të hënën, pasi ta kenë në tavolinë vlerësimin e ekspertëve.