Studentët e Departamentit të Mjekësisë kanë paralajmëruar se do të protestojnë para Rektoratit të Universitetit të Prishtinës në shenjë pakënaqësie ndaj padrejtësisë së ushtruar ndaj studentëve në provimin pranues. Gazeta Tribuna ka raportuar më 30 korrik se në provimin pranues në drejtimet Stomatologji, Farmaci dhe Kimi janë lëshuar shumë gabime, gjë që kanë bërë që shumë studentë të bien nga provimi.
Të hënën (sot) do të bëhet e ditur se kur do të protestohet për këtë çështje. “Protesta organizohet në shenjë pakënaqësie ndaj padrejtësisë së ushtruar ndaj studentëve në provimin pranues, me ç’rast për shkak të gabimit teknik nga ana e Universitetit, mbi 50 studentë kanë mbetur pa u pranuar”, thuhet në njoftimin e Këshillit Organizativ. Në raportimin e gazetës zyrtarë të UP-së kanë pranuar se gabimet ishin teknike dhe nuk kanë ndikuar në listat e të pranuarve.
Ardian Gola nga Rektorati ka thënë se testi është përpiluar mirë ndonëse e pranon faktin se janë bërë pa dashje disa lëshime teknike në tri pyetjet nga hartuesit. Madje ai ka potencuar se hartuesit e testit janë profesorë të shkolluar në Zvicër dhe Francë dhe se nuk kanë organizuar teste të kimisë. Megjithatë, siç kanë vlerësuar ekspertët e fushave për të cilat janë ankuar kandidatët, lëshimet teknike nuk kanë afektuar përmbajtjen shkencore të pyetjeve dhe përgjigjeve të sakta në test dhe si të tilla, këto shqetësime të dala në opinion janë të pabaza./Tribuna/