Kryetari i komunës se Prizrenit, Ramadan Muja, në debatin e dytë për këtë vit me qytetarët, ka raportuar për punën dhe realizimin e projekteve për gjashtëmujorin e parë.
Ai tha se, Komuna e Prizrenit ka arritur një varg suksesesh, por ende ka punë për tu bërë.
Po ashtu edhe drejtorët komunal kanë raportuar për të arriturat dhe sfidat që kanë patur dikasteret e tyre gjatë këtij gjashtëmujori. Drejtori i arsimit Nexhat Çoçaj, tha se, infrastruktura arsimore po shkon çdo ditë e më shumë drejt përsosmërisë, ndërsa sfidë për këtë periudhë ishin pagesat e punonjësve të ri.
Drejtori i Urbanizmit dhe planifikimit hapësinor Njazi Kryeziu, tha se drejtoria për të cilën ai përgjigjet ka arritur të pranojë 817 lëndë, ku 2016 prej tyre janë miratuar, ndërsa sa i përket legalizimeve, janë pranuar 27 mijë aplikacione.
Ndërkaq, kanë pasuar edhe shqetësimet e qytetarëve. Ata më shumë janë fokusuar në çështjet sociale, bllokimi i trotuareve, por nuk i lanë anash as mangësitë në infrastrukturë, sidomos në zonat rurale.
Përfaqësues të Zojzit dhe lagjes “Arbana” kërkuan më shumë angazhime në përmirësimin e jetës së popullatës, ndërsa banorë të Lutogllavës thanë se në këtë lokalitet nuk është investuar asnjë cent nga komuna.
Në infrastrukturë, drejtori i shërbimeve publike Hasan Hasani, tha se, të gjitha ato probleme që janë nën juridiksionin lokal, do të marinë fund, pasi një sërë projektesh janë duke u realizuar, ndërsa të tjera janë në planifikim.
Ndërsa për bllokimin e trotuareve, drejtori i inspektorateve Bedri Bytyqi , tha se së shpejti do të zgjidhen edhe këto shqetësime të adresuara nga qytetarët.
Debati i parë me qytetarë është mbajtur në muajin mars, ndërsa ky ishte i dyti e sipas zyrtarit për informim Ymer Berisha, planifikohen të mbahen edhe dy takime të tjera me qytetarë deri në fund të vitit. /TV Prizreni/