10 vjet betejë me gjykatat në Beograd, krejt i vetëm, në kërkim të trupave të familjarëve të tij.

Kjo është jeta e Bekim Gashit, të cilit në marsin e vitit 1999 iu vranë 14 anëtarë të familjes, mes tyre 4 motrat dhe nëna.

Dhjetëra prova dhe dëshmitarë që kishin parë nga afër këto vrasje nuk e bindën prokurorinë në Beograd të ndiqte për vrasjen e familjes Gashi tërë zinxhirin komandues, por vetëm dy pjesëtarë.

Derisa një periudhë ishte EULEX-i ai që e përcillte Bekim Gashin dhe të tjerët dëshmitarë në gjykatat e Beogradit, tash Gashi shkon atje pa përcjellje të askujt.

Ndonëse nuk pret gjykim të drejtë nga Gjykata në Beograd, Gashi thotë se nuk pati ku të drejtohet në institucionet e Kosovës.

Bekim Gashi është vetëm njëri nga mijëra familjarët, të cilët 20 vjet pas luftës janë në kërkim të trupave dhe eshtrave të të afërmve të tyre, të cilët vazhdojnë të figurojnë në listat e personave të pagjetur.