Wayne Rooney e urren dyfish Liverpoolin: për faktin që është një tifoz i Everton dhe ngaqë ka zhvilluar vitet më të bukura të karrierës te Manchester United. Sidoqoftë, sulmuesi i famshëm anglez tregohet realist në lidhje me skuadrën e Jurgen Klopp.
34-vjeçari i Derby County në Championship, e cilëson repartin ofensiv të “The Reds” si më të mirin në botë në një prononcim për The Times. Rooney nuk e kursen modestinë në një koment për veten e tij, duke pranuar se ka pasur shumë sulmues më të mirë se ai.
LIVERPOOL – “Shënimi i golave varet nga bashkëpunimi midis lojtarëve dhe Liverpool, që sulmon me tre, është rasti perfekt. Salah dhe Mane krijojnë thellësi në sulm dhe mbrojtësve u duhet të kthehen afër portës së tyre. Kjo ndihmon Firminhon, i cili sulmon në thellësi dhe e ka të lehtë të marrë kontrollin e topit.
Në momentin që mbrojtësit lodhen, Salah dhe Mane sulmojnë hapësirat me një shpejtësi të frikshme. Më kujtojnë lojën e Francesco Tottit te Roma, kur verdhekuqtë luanin me të si numër 10 dhe dy sulmues në krah. E kam të vështirë ta pranoj, por Liverpooli ka sulmin më të fortë në botë”.
MODESTIA – “Unë nuk kam qenë asnjëherë një golashënues natyral, nuk kam qenë asnjëherë si Van Nistelrooy. Jam golashënuesi më i mirë në histori për Manchester United dhe Anglinë, por të jem i sinqertë, ka shumë numra 9 që kanë qenë dhe janë shumë herë më të mirë se unë”.