Në Prizren është rrënuar edhe një shtëpi e vjetër, dhe ky është objekti i tretë i rëndësishëm që shkatërrohet brenda kësaj jave në këtë qytet.
Këtë e ka bërë të ditur përmes një postimi në Facebook drejtori i organizatës EC Ma Ndryshe, Hajrulla Çeku, i cili ka thënë se ky krim po ndodh para syve të të gjithëve, kurse autoritet përgjegjëse nuk po ndërmarrin asnjë veprim.
“Sot u rrënua edhe një shtëpi e vjetër në Prizren. Brenda vetëm një jave, në Qendrën Historike të Prizrenit u shkatërruan tre monumente: dy shtëpi të vjetra u rrënuan tërësisht dhe ndërtesa që është pjesë e Kompleksit të Kishës Katolike u kaplua nga zjarri për herë të dytë”, ka shkruar ai.
Çeku më tutje ka shtuar se, “çuditërisht të gjitha po ndodhin ditëve të fundjavës dhe natyrisht, shteti nuk po shfaqet në vendin e ngjarjes. Krimi po ndodh para syve të të gjithëve, ndërsa autoritetet përgjegjëse nuk po ndërmarrin asnjë veprim”.
Sipas tij, shkatërrimi do të vazhdojë edhe ditëve në vijim. Ai ka thënë se mosveprimi i zyrtarëve të shtetit nënkupton bashkëpjesëmarrje në krim.