Zëvendësministri i Punëve të Jashtme, Petrit Selimi, ka bërë me dije se Kosova shpreson fuqishëm se do të arrijë t’i marrë 2/3 e votave për anëtarësim në UNESCO.
Ai ka thënë se përfshirja e anëtarësimit të Kosovës në këtë organizatë në agjendë nga Këshilli Ekzekutiv i UNESCO-s është një ogur i mirë për votimet e mëvonshme.
Në këtë intervistë për “Epokën e re”, Selimi ka pranuar se fushata e egër e Serbisë për ta penguar anëtarësimin e Kosovës në këtë organizatë do të ketë ndikim te disa shtete.
“Votimi më 21 tetor është në bord ekzekutiv për një rezolutë përkrahëse për anëtarësim, ndërsa në javën e dytë të nëntorit votohet për anëtarësim. Kemi shpresa të fuqishme se do t’i bëjmë 2/3 e votave që nevojiten për anëtarësim. Serbia ka një fushatë të egër dhe shumë negative. Kjo do të ketë ndikim në disa shtete”, ka thënë Selimi.
Ai ka treguar se tani Ministria e Punëve të Jashtme të Kosovës është duke e vazhduar fushatën pozitive në 195 kryeqytete, sidomos në shtetet që duken abstenuese për marrjen e votave të nevojshme për anëtarësim në UNESCO. Sipas tij, tashmë Kosova ka arritur t’i prezantojë mjaft mirë argumentet për ta arritur qëllimin e synuar.
“Kemi bërë hesap se disa shtete do të jenë kundër dhe kemi përgatitur dhe pajisur aleatët e Kosovës me kundërargumente. Mendoj se tashmë dihen argumentet tona si dhe sulmet negative të Serbisë totalisht pa argumente”, është shprehur ai.
Më tutje, ai është shprehur i shokuar me gënjeshtrat e diplomacisë serbe për ta penguar anëtarësimin e Kosovës në këtë organizatë.
“S’mund ta fsheh faktin se jam i shokuar me strategjinë e Serbisë. Ajo bazohet në një qasje tejet negative dhe gënjeshtra të kulluara. Qeveria e Serbisë po shpreson se, nëse i përsërit shumë herë deklaratat e paqena, ndoshta një numër i mjaftueshëm shtetesh do t’u besojnë atyre”, ka deklaruar Selimi.
Ndër të tjera, zëvendësministri i MPJ-së ka treguar se, pas anëtarësimit të Kosovës në UNESCO, prioritet kryesor i diplomacisë së vendit do të jetë anëtarësimi në Këshillin e Evropës dhe afrimi me NATO-n. /Epoka e Re