Pasi paditi dhe fitoi çështjen ndaj Rafael Leao-s për mënyrën e transferimit të këtij të fundit te Lille, Sporting Lisbona ka gati një tjetër rast disi të ngjashëm.
Sipas informacioneve të publikuara në gazetën e përditshme portugeze “A Bola”, Sporting ka ngritur padi ndaj ish-lojtarit të tyre, Joao Mario.
29-vjeçari u bashkua me Inter-in në vitin 2016, pasi italianët paguan 40 milionë euro. Ai kishte kaluar në të gjitha ekipet zinxhire të klubit, para se të shpërthente me skuadrën e parë dhe të kalonte te zikaltrit.
Pas eksperiencës zhgënyese te Inter-it, Mario u huazua te West Ham, Lokomotiv Moscow dhe Sporting.
Në verën e 2021, portugezi përfundoi kontratën me Inter-in dhe pasi ishte në huazim te Sporting, vendosi të bashkohej me rivalët e qytetit, Benfica-n.
Pikërisht kalimi i mesfushorit te Benfica, ka bërë që Sporting ta padisë dhe të kërkojë 30 milionë euro dëmëshpërblim.
Kjo për faktin se kur lojtari u transferua te Inter-i në kontratën e tij u vendos një klauzolë e cila e detyronte atë të paguante 30 milionë euro në rast të anëtarësimit të tij në një klub luzitanian.
29-vjeçari u aktivizua sezonin e fundit në 45 ndeshje në të gjitha garat me Benfica-n, duke arritur të realizoi katër gola dhe shtatë asistime.
/Albanianpost.com