Kryeministri i Kosovës, Avdullah Hoti ka thirrur të shtunën në takim urgjent u.d. të kryeshefes së Telekomit, Burbuqe Hana, bordin dhe Sindikatën e Telekomit për të biseduar rreth bllokimit të llogarive të Telekomit.
Telekomit iu bllokuan llogaritë, pasi Gjykata Themelore në Prishtinë ia ka njohur të drejtën Z-mobile për përmbarimin e borxhit të Arbitrazhit.
Sipas burimeve të KOHËS, takimi pritet të mbahet në ndërtesën e Qeverisë në orën 14:00.
Takimi është konfirmuar edhe nga Telekomi.
Nga kjo ndërmarrje është thënë që takimi është thirrur me iniciativë të ministrit të Ekonomisë, Blerim Kuçi.
Me bllokimin e llogarive të Telekomit, nga kjo ndërmarrje është paralajmëruar se nuk mundet edhe gjatë të ofrojë shërbimet e saj.
Mes të tjerash, sipas drejtorit teknik, do të ketë pasoja edhe për sigurinë shtetërore.