Kryeministri i Kosovës, Hashim Thaçi dhe lideri i LDK-së, Isa Mustafa janë pajtuar që zgjedhjet do të mbahen në pjesën e parë të qershorit, dhe që shpërndarja e Parlamentit të bëhet në fund të prillit.
Por jo vetëm kaq.
Burime brenda takimit të fundit Thaçi- Mustafa, që ishte mbajtur larg nga syri i gazetarëve i kanë treguar Gazetës Blic kryeministri i ka premtuar liderit të opozitës se do të japë edhe dorëheqje në fund të prillit, nëse Lidhja Demokratike e Kosovës nuk do ta mbështes mocionin e votëbesimit të qeverisë, që ishte ngritur javën e kaluar nga partia e Ramush Haradinajt, Aleanca për Ardhmërinë e Kosovës.
Megjithatë, zyrtarisht as zyrtarët e PDK-së e as ata të LDK-së nuk kanë pranuar që të japin detaje të takimit të liderëve Thaçi- Mustafa që ishte zhvilluar në fund të javës që e lamë pas.
Krejt çka është bërë publike nga ky takim, ishte një kumtesë për medie, ku ishte thënë se dy liderët, ai i PDK-së dhe ai i LDK-së janë pajtuar që në zgjedhje të shkohet në muajin qershor, dhe të bëhen disa ndryshime sipërfaqësore në Ligjin për zgjedhjet.
Madje, në një intervistë për RTK-në, Isa Mustafa e ka propozuar 8 qershorin si datë të mundshme për zgjedhjet e parakohshme nacionale. Këtë datë nuk e ka përjashtuar as kryeministri Hashim Thaçi.
Ndërkohë, zyrtarët e AAK-së edhe pse duket nuk do ta kenë mbështetjen e partisë më të madhe opozitare për të vazhduar me mocionin, shefi i Grupit Parlamentar të kësaj partie, Ardian Gjini ka thënë se ata do të vazhdojnë tutje me këtë mocion.