Zëvendëskryeministri Hashim Thaçi, pas kthimit nga Nju Jorku ka thënë se nuk ka bllokim as të Kuvendit, as të Qeverisë dhe jemi larg krizës politike.
Për Indeksonline, Thaçi ka thënë se në Kuvend kemi vetëm përpjekje të pengimit të punës së rregull nga partitë opozitare, kemi uzurpim të hapësirës që duhet të shfrytëzohet për të mirën e qytetarëve dhe kjo është krejtësisht në kundërshtim me rregullat e punës së Kuvendit, por edhe në kundërshtim me rregullat e vetë demokracisë.
“Po presim që vetë opozita ta kuptojë se është duke vepruar kundër institucioneve të shtetit, kundër vetë Kosovës”, ka thënë Thaçi.
Si qeveri, sipas Thaçit, Kosova asnjëherë nuk ka pasur koalicion qeverisës më të fuqishëm dhe më stabil.
“Vështrimin e kemi kah të arriturat, si MSA-ja dhe liberalizimi i vizave, formimi i FAK-ut dhe kah anëtarësimi në Partneritetin për Paqe, anëtarësimi në UNESCO, INTERPOL, UEFA e FIFA, në Këshillin e Evropës dhe në shumë institucione tjera, e kemi edhe kah Procesi i Berlinit dhe zhvillimi ekonomik”, ka deklaruar Thaçi për Indeksonline.
Këto të arritura sigurisht që e acarojnë opozitën politike, ka thënë ai, por që edhe opozita duhet të veprojnë me mjete politike dhe jo të kërcënojnë me dhunë.