Zhvillimet e së premtes në Kuvendin e Kosovës kanë thelluar dallimet ndërmjet përfaqësuesve të koalicionit qeverisës dhe opozitës.
Përderisa pushtetarët thonë se ishte i domosdoshëm vazhdimi i seancës në një sallë tjetër në Kuvend, opozitarët thonë se kjo paraqet shkelje të demokracisë dhe paralajmërojnë se nuk do të ndalen së bllokuari punën e Kuvendit derisa të zhbëhet Marrëveshja për Asociacionin dhe ajo për Demarkacionin e Kufirit me Malin e Zi.
Presidentja e vendit, Atifete Jahjaga, ka shprehur shqetësim e saj lidhur me zhvillimet në Kuvend dhe jashtë tij dhe ka apeluar te deputetët e opozitës që të heqin dorë nga dhuna.
“Jam thellësisht e shqetësuar dhe shpreh keqardhjen time të thellë për zhvillimet në Kuvendin e Kosovës dhe jashtë tij. Skenat dhe veprimet e dhunshme në Kuvend janë të dënueshme dhe të papranueshme. Mjetet e përdorura janë plotësisht në kundërshtim me parimet bazike të një rendi demokratik dhe një demokracie parlamentare. Apeloj te deputetët e opozitës të heqin dorë nga dhuna”, ka deklaruar Jahjaga, duke thënë se aspiratat e vendit tonë po rrezikohen thellësisht nga këto ngjarje.
Ndërsa kryetari i Kuvendit të Kosovës, Kadri Veseli, ka thënë se ka qenë një situatë e vështirë për të gjithë./zeri/