Lëvizja Vetëvendosje në Dragash, kërkon nga kryeministri i Kosovës, Ramush Haradinaj, që të mos fuqizojë strukturat paralele serbe në Gorë.
“I bëjmë apel kryeministrit, Haradinaj, që mos të ndikojë në fuqizimin e këtyre strukturave, por të ndërmarr masa të menjëhershme për eliminimin e tyre, pasi të gjithë e dimë se ato paraqesin cenim të sovranitetit të Republikës së Kosovës”, thuhet në reagimin e VV-së në Dragash,transmeton “PrizrenPress”.
Kryeministri i Kosovës, Ramush Haradinaj, ka qëndruar në fshatin Brod të Dragashit.
Ai, atje banorëve u ka premtuar krijimin e një komune për ta.
Haradinaj këtë premtim e bëri në shënimin e Ditës së Goranëve në këtë fshat.
“Krijimi i një komune të re, asaj të Gorës nuk është humbje për shqiptarët kudo që janë as në Opojë, as në Prizren apo diku, përkundrazi u mundëson këtyre njerëzve të jetojnë dhe t’i kenë mundësitë për jetë dhe jam përkrahës i një komune në Gorë që jeta të zhvillohet në mënyrën më të mirë të mundshme”.
“Kemi biseduar për mënyrën e jetesës për temat se çka mund të bëjë qeveria nacionale. Kjo është iniciativë e deputetit të nderuar Adem Hoxha, që është deputet goran në parlamentin e Kosovës dhe kam ardhur këtu me propozimin e deputetit që të informohem për gjendjen dhe proceset këtu”.
Lëvizja Vetëvendosje në Dragash, vlerëson ndërkaq se, premtimi i Haradinajt është pasojë e votës së demarkacionit nga ana e deputetit nga komuniteti goran Adem Hodza.
“Në ditët kur po negociohej me deputetë për votimin e një marrëveshje që Kosovës i’a humbi rreth 8000 hektarë tokë, Adem Hodzes, deputetit nga Lista serbe, në këmbim të votës, iu premtua themelimi, apo thënë më mirë legjitimiteti i një komune të Gorës, pasi e njëjta është funksionale në kuadër të strukturave paralele serbe në Kosovë”./PrizrenPress.com/