Sekretari i përgjithshëm i PDK-së, Basri Musmurati, ka thënë se ka ardhur koha që Kosova ta ketë një president të fuqishëm.
“Shtrohet pyetja: A na nevojitet neve një president i fuqishëm, ku nuk mund të përzihen tepër subjektet politike për interesat e tyre?. Unë mendoj se gati, gati jemi pjekur si shoqëri për ta pasur një president të tillë dhe ta fuqizojmë tek e fundit këtë post”, ka theksuar Musmurati të hënën gjatë tryezës së organizuar nga KIPRED-i me temën: “Subjektet politike në Kosovë, demokracia e brendshme, sistemi politik dhe fushata zgjedhore”.
Edhe deputeti i LDK-së, Salih Morina, ka thënë se zgjedhja e presidentit drejtpërdrejt nga populli do t’i ndihmonte demokracisë.
“Po besoj që së bashku si subjekte politike duhet të angazhohemi dhe të luajmë një rol konstruktiv që në zgjedhjet e ardhshme kurdo që ato mbahen zgjedhja e presidentit të bëhet nga populli”, është shprehur Morina.
Zgjedhja e presidentit me votën e drejtpërdrejtë të popullit është kundërshtuar nga përfaqësues të opozitës.
Sekretari organizativ i Lëvizjes Vetëvendosje!, Dardan Molliqaj, ka thënë se do të ishte e pakuptimtë që presidenti të zgjidhej drejtpërdrejtë, pasi që Kosova është shtet me sistem parlamentar.
Edhe nënkryetari i AAK-së, Ardian Gjini, ka thënë se nuk sheh asnjë arsye pse Kosova duhet të bëhet sistem presidencial.
“Po i ndryshojmë rregullat shumë shpesh për të realizuar ambiciet personale të dikujt qoftë në parti qoftë në shtet. Asnjë republikë presidencial përveç SHBA-ve dhe Francës nuk funksionojnë mirë. Personalisht nuk shoh arsye as demokratike e as sociale e as filozofike pse duhet për t’u ndërruar kjo rregull, përpos që ia plotësojmë dikujt ambiciet personale”, ka deklaruar Gjini. /Epoka e re/