Kandidati i Nismës për kryetar të Prizrenit, Zafir Berisha, ka përqeshur të gjithë kundërkandidatët e tij në zgjedhjet lokale të 22 tetorit.
Duke folur për kandidatin e PDK-së, Shaqir Totajn, Berisha ka thënë se nuk e ka njohur më parë dhe se “ka dalë në Çarshi për të mësuar kush është ai”.
“Për herë të parë e kam parë në fotografi kur është prezantuar nga Kadri Veseli. Kam dalë në Çarshi për të mësuar se kush është ky kandidat. Prej momentit që është imponuar ky si kandidat i PDK-së gjysmën e kryesisë nuk e ka mbrapa. Nuk e shoh si kundërshtar të denjë”, ka thënë Berisha.
Sa i përket Hatim Baxhakut të LDK-së, Berisha ka thënë se ka respekt për të si doktor, por ai është shumë larg politikës. “LDK-ja pothuajse në 17 katunde më nuk e ka asnjë votues, ndërsa Baxhakut i është dëgjuar zëri nja dy herë në Kuvend si deputet”.
Kandidatin e VV-së, Mytaher Haskukaj, Berisha e mban mend për gjuajtjen me gaz në Kuvend të Kosovës.
“Ai ka qenë aktiv në Parlament, pasi ka gjuajtur kryeministrin me gaz. Ai nuk ka qëndruar rregullisht në Prizren”, ka thënë Berisha për kandidatin e VV-së.
Berisha e sheh veten si kandidatin më të mirë për Prizrenin dhe thotë se pas tij afër njëra-tjetrës janë LDK-ja dhe Vetëvendosje. /Koha.net/