Bashkimi do të takohet sonte me Sigal Prishtinën, e cila në 21 ndeshjet e deritashme nuk ka pësuar asnjë humbje. Prizrenasit e kanë rastin të testojnë mundësitë e tyre që në play-off ta mposhtin kampionin aktual dhe pas një kohe të gjatë të ndërpresin dominimin e kryeqytetasve. Kapiteni, Qëndrim Biraj, beson se skuadra e tij mund të triumfojë në ndeshjen e sotme dhe në këtë mënyrë të konfirmojë edhe më seriozisht kandidaturën për titull.
“Do të jemi të hendikepuar në pozitën e qendrës, pasi Urim Zenalaj nuk e ka sanuar lëndimin, ndërsa edhe përforcimi i paralajmëruar (Frederic Stutz) nuk ka arritur ende. Si do që të jetë, ne jemi përgatitur maksimalisht, luajmë në palestrën tonë dhe do të japim gjithçka për të shënuar fitore. Do të përpiqemi të mos i përsërisim gabimet që na u shfaqën në finalen e Kupës, në të kundërtën do ta kemi shumë vështirë të arrijmë rezultatin e dëshiruar”, ka thënë Biraj për Insporti.com.
Te Sigal Prishtina pritet të ketë risi, pasi skuadrës i është bashkuar kroati Filip Bundoviç, njëherësh lojtari i vetëm i huaj në radhët e kryeqytetasve. Para ndeshjes së sotme, Sigal Prishtina kryeson renditjen me 42 pikë, pesë më tepër se Bashkimi që gjendet në pozitën e dytë. Ndeshja fillon në orën 19:30 dhe zhvillohet në palestrën “Sezai Surroi” në Prizren.