Komuna e Suharekës ka bërë të ditur se ka krijuar platformën elektronike për regjistrimin online të personave të ardhur nga diaspora, me qëllim të parandalimit të përhapjes së sëmundjes COVID-19.
Për shkak të pandemisë, kjo komunë ka kërkuar nga të gjithë bashkatdhetarët që jetojnë në mërgim, por edhe nga qytetarët që kohëve të fundit kanë vizituar shtetet e jashtme që të regjistrohen në platformën online.
Të dhënat e kërkuara janë emri dhe mbiemri, vendbanimi, telefoni, shteti prej nga vjen personi dhe data e hyrjes së tij në Kosovë. Në njoftimin e Komunës thuhet se të dhënat mbrohen sipas legjislacionit në fuqi, transmeton KOHA.
Ditë më parë, kryetari i Komunës së Suharekës, Bali Muharremaj pat bërë thirrje që kryetarët e fshatrave dhe drejtorët e shkollave ti evidentojnë qytetarët të cilët kanë ardhur në javët e fundit nga diaspora dhe këto të dhëna ti dërgojnë te autoritetet lokale të shëndetësisë.