Ka dy vite që 1016 të burgosur kërkojnë mëshirë nga presidentja e Kosovës, Atifete Jahjaga.

Mirëpo e para e shtetit gjatë kësaj periudhe nuk e ka falur as edhe një të burgosur që janë në vuajtje të dënimit.

Nëpër të gjitha burgjet e Kosovës janë rreth 1600 të burgosur. Ata do të duhet të presin që kërkesat e tyre t`i dërgojnë tek presidenti i ri Hashim Thaçi i cili do ta marrë zyrtarisht mandatin me 7 prill, të njëjtën ditë kur përfundon mandati pesë vjeçarë i Jahjagës.

Zyra e Presidentes së Kosovës tregoi për Gazetën Fjala se gjatë dy viteve në adresë të presidentes kishin arritur më shumë se 500 kërkesa për falje.

“Në vitin 2015 kemi pas 512 kërkesa për falje. Në vitin 2016 kemi pasur 504 kërkesa për falje”, thuhet në këtë përgjigje.

Megjithëkëtë presidenca nuk u përgjigj kur është pyetur nga Gazeta Fjala për arsyen e mos faljes së asnjë të burgosuri.

Falja e të burgosurve ka filluar të bëhet nga vitit 2009, kur ish presidenti Fatmir Sejdiu pati falur 62 të burgosur.

Betim Musliu drejtor ekzekutiv i Institutit të Kosovës për Drejtësi tha se keqpërdorimi i institutit të Faljes Presidenciale në të kaluarën nga ish-Presidentë ka ndikuar në rënien drastike të faljes së të dënuarve në vitet e fundit nga Presidentja Jahjaga.

Sipas Musliut Presidentja Jahjaga duhet të shpreh mëshirën e saj për ata të dënuar që kanë dëshmuar sjellje të mira dhe që plotësojnë kriteret e ligjit për t’i falur.

“Nuk është e drejtë që për shkak të keqpërdorimit të faljes në të kaluarën të pësojnë vazhdimisht të dënuarit që meritojnë falje”.

“Natyrisht, Presidentja nuk është dashur dhe askush nuk duhet të bëjnë shkelje të ligjit, por për ata që meritojnë dhe i plotësojnë kriteret ligjore, falja duhet të zbatohet sepse është një korrektues i mirë që ndikon tek të gjithë të dënuarit e tjerë që të kenë sjellje të mira gjatë vuajtjes në burgje që të ri socializohen dhe thjesht në raste të caktuara falja shërben edhe si institut përmes të cilit korrektohen gabimet e gjykatësve me rastin e shqiptimit të dënimeve”, tha Musliu.

Presidentët e vendit këtë të drejtë ligjore zakonisht e kanë shfrytëzuar më 17 shkurt, Ditën e Pavarësisë së vendit.

Por Musliu thotë se duhet bërë e qartë se Kushtetuta dhe Ligji për Falje nuk kufizohet në data dhe në numër të të dënuarve që mund të falen.

“Në Kosovë është krijuar praktikë që falja e të dënuarve të bëhet me rastin e Pavarësisë së Kosovës, por nuk ka asnjë kufizim që edhe për festa tjera të rëndësishme Presidentja të fal të dënuarit për të shprehur mëshirën e saj ndaj të dënuarve me sjellje të mira”, tha Musliu.

Nga ana tjetër  kryetari i organizatës për mbrojtjen e të drejtave dhe lirive të njeriut (KMLNj), Behgjet Shala, ka thënë për Gazetën Fjala se mos falja e të burgosurve nga ana e presidentes po u humbë vullnetin atyre pasi qe ata ndihen të diskriminuar që presidentja ka thyer praktikën disa vjeçare për faljen.

Sipas Shalës mos falja dhe moszbatimi i praktikës nga presidentja ndikon në rebelimin si dhe ngjallë konflikte në burgje nga të burgosurit.

“Është gjithçka në rregull që presidentja t’i fal të burgosurit, ngase ata ka dy vite që presin mëshirën e saj. Është pa koment që për dy vite mos të falet asnjë i burgosur nga ana e presidentës “, ka thënë Shala për Gazetën Fjala.

“Presidentja është dashur që me falje t’i inkurajojë me falje të dënuarit”, ka shtuar Shala. Ai shpreson që presidenti i ardhshëm  i Kosovës, Hashim Thaçi mos ta ndjekë praktikën e Jahjagës dhe t’i fal të burgosurit.

“Nuk është asgjë që dikush që është i  dënuar me 40 vjet burg t`i falen 4 vite, dmth të burgosurit nuk po falen nga burgu, por atyre në këtë mënyrë u ipet përkrahje dhe një mundësi për përmirësim”, ka shpjeguar Shala.

Presidentja Atifete Jahjaga në vitin 2014 për herë të fundit kishte falur dënimin e të burgosurve, me vendim të saj ishin falur vetëm 2 nga 515 sa kishin kërkuar.  /Gazeta Fjala/

Nënkryetarja e Kuvendit të Kosovës nga radhët e Lëvizjes Vetëvendosje!, Aida Dërguti, ka treguar se kjo lëvizje nuk do të marrë pjesë në seancën e sotme të Kuvendit.

Ajo ka thënë se bojkoti i punës së Kuvendit nga VV-ja nuk do të jetë sikurse ai i AAK-së dhe Nismës.

Dërguti në një intervistë për “Epokën e re” ka bërë me dije se Lëvizja Vetëvendosje! do të marrë pjesë në seancat e Kuvendit vetëm kur e sheh të nevojshme praninë e saj për të penguar ndonjë vendim të dëmshëm për interesat e qytetarëve.

Ajo ka thënë se nga pozita nuk do të pranojnë kurrfarë oferte për dialog.

Sot shënohet shtatëmbëdhjetë vjetori i sulmeve ajrore të forcave të NATO-s kundër caqeve serbe në Kosovë dhe në Serbi. Sulmet filluan më 24 mars të vitit 1999, pak para orës 20:00, me urdhër të ish-sekretarit të përgjithshëm të NATO-s, Havier Solana.

Bombardimet mbi caqet serbe në ish-Jugosllavi, nga aviacioni i NATO-s, shënuan fillimin e përfundimit të agonisë së shqiptarëve të Kosovës nën regjimin e Serbisë.

Pas 78 ditë bombardimesh të NATO-s, Sllobodan Millosheviqi, në atë kohë president i Serbisë, u dorëzua në qershorin e vitit 1999 dhe e pranoi Marrëveshjen e Kumanovës.

Pas bombardimeve u krijuan kushtet për kthimin e shpejtë të rreth 1 milion shqiptarëve të Kosovës, të cilët autoritetet serbe i kishin dëbuar me dhunë në Maqedoni dhe Shqipëri, si dhe në vendet tjera të botës.

Mbi 12 mijë të vrarë, 2 mijë persona të pagjetur dhe mbi 800 mijë persona të dëbuar nga Kosova, ishte bilanci në njerëz i konfliktit në Kosovë.

Presidenti i atëhershëm amerikan, Bill Klinton, duke i krahasuar ngjarjet në Kosovë me ato të Holokaustit, pati deklaruar se “NATO-ja u dha fund përpjekjeve të qëllimshme dhe sistematike për spastrim etnik dhe gjenocid”.

Më 10 qershor, Këshilli i Sigurimit i Kombeve të Bashkuara miratoi Rezolutën 12 44, me të cilën vendosi administratën e përkohshme të OKB-së në Kosovë dhe fuqizoi praninë ushtarake të KFOR-it.

Misioni paqeruajtës i NATO-s, KFOR-i, ende qëndron në Kosovë dhe ndihmon në transformimin e mëtutjeshëm të Forcës së Sigurisë së Kosovës.

Kosova, në partneritet me bashkësinë ndërkombëtare, ndërtoi institucionet e saj, të cilat më 17 shkurt të vitit 2008, shpallën pavarësinë e Kosovës. /Rel/

Shumë shpejt pritet zbardhja e vrasjes së Elvis Pistës, ish- kandidat i PDK-së për deputet në zgjedhjet e fundit nacionale. Paralajmërimi vjen nga motra e tij, Beatrisa Pista-Demiri, e cila tha se po punohet shumë në këtë drejtim.

Në prag të dy vjetorit të vrasjes, motra e ish-kandidatit të PDK-së për deputet Elvis Pista, thotë se vrasja e tij është shumë afër zbardhjes.

“Shumë mirë të gjithë e dinë se vrasja në njëfarë formë ka qenë hollivudine edhe e përgatitur shumë mirë. Aq e përgatitur në mënyrë profesionale sa që po del të jetë një kafshatë e madhe për hetuesit vendorë. Mund të them lirisht se janë duke punu shumë edhe pritet që së shpejti të zbardhet rasti”, tha Pista-Demiri në emisionin ‘Perspektiva, prodhuar nga Artvision portalin Rahoveci24.

Pista-Demiri nuk e mohon mundësinë se vrasja mund të ishte politike, por thotë se dikush edhe mund ta ketë shfrytëzuar situatën, që vrasja të dukej e tillë.
Kandidati për deputet në Kuvendin e Kosovës nga radhët e PDK-së, Elvis Pista u vra në mesnatën mes 14 dhe 15 qershorit rreth orës 00:45 në oborrin e restorantit “Jaha” në Rahovec.

Thotë se nuk janë të kënaqur me punën e prokurores Shpresa Bakija dhe po mendojnë që çështjen ta dërgojnë edhe në Gjykatën Speciale.