Shkruan: Orhan Bislimaj
Ndërtim të xhamive dhe kishave do të ketë edhe në të ardhmen, jo vetëm në Llapushnik të Drenicës. Por, le të shpresojmë se do të ndërtohen për nevojat e qytetarëve dhe asnjëherë si përllogaritje (gjeo)politike.
Ky diskurs, i ka mbajtur të bashkuar, si vëllezër, myslimanët e katolikët shqiptarë. Përkdhelja e njëanshme e institucioneve të Kosovës ndaj të krishterëve, katolikë e ortodoksë, që është duke ndodhur tash e 16 vjet, është shndërruar në injorim përmanent për myslimanët.
Askush në Kosovë, nuk ka ndonjë urrejtje ndaj katolikëve, madje as ndaj ortodoksëve serbë, por, siç po shihet po mbëltohet tharmi i nervozizmit ndërfetar në Kosovë, si pasojë e njëanshmërisë së tepruar të institucioneve përkatëse. Fatkeqësia më e madhe për ne si shoqëri, do të ishte nëse dikush çohet në protesta të padëshiruara për të drejtat e tyre fetare, në emër të lirive dhe të drejtave të njeriut.
Kjo nuk i bën nder askujt! Gjithë kohën mund të flasim për tolerancë ndërfetare, por kjo do të mbetet një lule e pa rrënjë, nëse politikat e Qeverisë dhe të Komunave na çojnë në drejtimin e kundërt. Po presim, çfarë do të veprohet me “xhaminë në Kala” të Prizrenit dhe të “Arrastës” në Prizren. Ato i kanë themelet ashiqare dhe po presin drejtësinë. Jemi lodhur duke bërë kërkesa me shkrim nëpër institucione, askush nuk përgjigjet! Kjo klimë duhet përmirësuar, pasiqë vetëdija qytetare brumoset gradualisht dhe nuk mund të zhbëhet brenda natës.