Presidentja e vendit, Atifete Jahaga duhet t’i shpallë zgjedhjet e reja të parakohshme sa më parë që është e mundur, madje një gjë të tillë do të ishte mirë që ta bënte qysh nesër, pasi që kriza politike në të cilën është futur vendi nuk mund të tejkalohet në asnjë formë tjetër për shkak të barrikadimit ekstrem të dy blloqeve politike, PDK-së në njërën anë dhe Bllokut VLAN në anën tjetër.

Kështu ka vlerësuar njohësi i çështjeve kushtetuese dhe ish-kryeshefi i Komisionit Qëndror Zgjedhor, Mazllum Baraliu.

“Zgjedhjet duhet të shpallën sa më parë që të jetë e mundur sepse është tejkaluar çdo limitë kohor dhe gati ka humbur kuptimin kjo mënyrë e indiferencës deri në indolencë të subjekteve politike. Presidentja duhet ta merr këtë punë seriozisht dhe duhet të veprojë menjëherë pasi që të dyja blloqet janë të barrikaduara dhe nuk lëvizin nga pozicionet e tyre”, ka thënë Baraliu për Zërin.

Ai më tej ka thënë se çështja e shpalljes së zgjedhjeve është e drejtë e presidentes së vendit sipas nenit 84 paragrafi 3. Prandaj sipas tij në qoftë se nuk ka një marrëveshje në mes liderëve politik si në Kuvend apo një koncensues, gjithsesi nuk ka opsion tjetër përveç shpalljeve të zgjedhjeve.

“Ky opsion jo që është real por i detyrueshëm nëse nuk gjejnë një zgjidhje liderët politik. Kjo gjendje nuk mund të shtyhet tutje. Ajo mund ta shfrytëzojë të drejtën kushtetuese që t’i shpallë zgjedhjet dhe kjo argano politike nuk mund të zgjasë pafundësisht që do të paraqitën probleme të mëdha edhe vitin që vjen. Kushtetuta parasheh që presidentja mund t’i shpallë zgjedhjet brenda 30 deri në 45 ditësh. Por mendoj se presidentja duhet sa më shpejtë që t’i shpallë zgjedhjet nëse palët nuk shënojnë lëvizje pozitive në drejtim të gjetjes se një zgjidhje nuk ka pse të humbet kohë. Ajo do të duhej qysh nesër t’i shpallë zgjedhjet sepse shtyrja edhe për një javë do të jetë humbje e madhe dhe jo të caktojë 45 ditëshin, por brenda 30 ditëve”, është shprehur Baraliu.

Sipas tij mbajtja e zgjedhjeve në dimër, (në muajin dhjetor) nuk është periudhë e përshtatshme, por që është e detyrueshme.

Baraliu poashtu ka thënë se disa subjektete politike veçse kanë dhënë shenja se vendi po shkon drejtë zgjedhjeve me organizimin e aktiviteteve me anëtarësinë e tyre dhe me elektoratin në teren.

Adem Demaçi vlerëson se me zgjedhjet eventuale të jashtëzakonshme, që do të shënonin mbajtjen e tyre dy herë brenda një periudhe të shkurtër, askush nuk do të fitonte, ndërsa ato do të merrnin edhe më shumë kohë për krijimin e institucioneve të reja.

Duke folur për Politiko.net, ai shprehet se do të ishte mirë që të gjitha partitë politike parlamentare të sakrifikojnë diçka, në mënyrë që sa më shpejtë Kosova të bëhet me institucione, tashmë kur prej përfundimit të zgjedhjeve të qershorit vendi ka hyrë në një krizë të thellë politike.

“Unë jam me atë pjesën e popullit që me të vërtetë pret që këta vëllezërit tanë, të cilët synojnë pushtetin, mos të lejojnë shkuarjen në zgjedhjet e reja”.

“Nëse do të ketë zgjedhje, jo vetëm që merr kohë, por kam frikë se do të dalin humbës të gjithë. Nuk është mirë të dalim humbës, pas gjithë këtyre pritjeve. Ka zgjidhje, vetëm duhet që partitë e mëdha të heqin dorë nga disa interesa të ngushta”.

“Edhe pse është vonuar kjo punë, duhet të gjendet një zgjidhje me vullnet të faktorit politik. Do të ishte më e hijshme, do të kishte më shumë fitim sesa humbje”.

Demaçi tërheq vërejtjen se ngërçi i stërzgjatur politik është duke i shkaktuar vendit probleme të mëdha, ndërkohë që jeta institucionale pothuajse është paralizuar.

Thotë se PDK dhe Blloku duhet t’i bëjnë disa sakrifica.

“Të mos vonohen më tutje, sepse është bërë shumë. Unë po mrekullohem me këtë popullin tonë sa i durueshëm është dhe sa nuk po zemërohet nga kjo situatë. Por, megjithatë, është duke pritur me shpresë që të gjendet njëfarë rrugëdalje”.

“Mendoj që katër deri në pesë muaj me këtë situatë, ku janë ndalur krejt institucionet, ku nuk po funksionojnë si duhet, është bërë mjaft. I kam vëllezër, edhe ata, edhe këta, në këto parti. Lufta për pushtet është legale dhe duhet të përpiqen. Por, është bërë shumë”.
“Nuk ka zgjidhje tjetër, pos të ulen dhe të heqin dorë nga ato interesat e ngushta partiake dhe të mendojnë edhe për interesin e këtij populli të gjorë, të këtij shteti tonë të shkretë që po pret”, deklaron Adem Demaçi për Politiko.net.

Ai rikujton se liderët politikë, nëse e kanë kërkuar votën e qytetarëve dhe e kanë marrë atë, kanë obligim ndaj popullit.

Presidentja Atifete Jahjaga ka tentuar disa herë ta gjejë zgjidhjen për dalje nga ngërçi, me takime të ndara mes liderëve politikë, por asgjë nuk ka rezultuar suksesshëm.
Ftesa e saj për takim gjithëpërfshirës, ndërkaq, është duke u refuzuar nga partitë e Bllokut, LDK, AAK, Nisma dhe Vetëvendosje.
Demaçi e sheh si të mirë përpjekjen e Presidentes.

“Po them se nuk e ka keq Presidentja që po bën përpjekje kaq shumë, që po insiston kaq shumë. Nëse duan, faktikisht zgjidhja është. Duhet sakrificë. Mund të gjendet njëfarë rrugëdalje”.
Ai përsërit se zgjidhjen mund ta gjejnë vetë liderët politikë kosovarë, pa pasur nevojë për ndërhyrje ndërkombëtare.

Konsideron se nuk do të ishte mirë që faktori ndërkombëtar të detyrohej të shtronte presion.
“Nuk është mirë që ne ta sjellim punën deri aty”. / Politiko.net

Delegacioni nga Komuna e Malishevës, që është duke qëndruar në Turqi, me ftesë të Komunës së Orhangazit, sot ka vizituar qytetin e Bursës, përkatësisht Konsullatën e Nderit të Kosovës, në Bursa, ku janë pritur nga stafi i konsullatës kosovare, ndërsa më pas, delegacioni ka vizituar edhe fabrika, qendra profesionale dhe vende tjera, përderisa në Bursa, janë shoqëruar nga kryetari i Shoqatës Kosova-Shkupi, Recep Gunduzi.

Delegacioni nga Malisheva, të cilit i prin kryetari i Malishevës, Ragip Begaj, e ku bëjnë pjesë edhe kryesuesi i KK të Malishevës, Enver Hoti, drejtor të drejtorive komunale, anëtar të KK të Malishevës dhe zyrtar të tjerë, kanë vizituar edhe fabrikën “Ermetal”, fabrikë e cila merret me prodhimet e metaleve, plastikës dhe brumërave, ndërsa janë pritur nga menaxheri i saj, Zaim Turksever, i cili i ka njoftuar me prodhimet e fabrikës dhe mënyrën e funksionimit të këtij lloji të biznesit.

Më pas, delegacioni nga Malisheva, ka vizituar edhe Qendrën e aftësimit profesional, qendër e cila funksionin në kuadër të Odës Ekonomike të Bursës dhe është e themeluar nga biznesmeni shqiptar Fahretin Gulener.

Edhe grupi i medieve Bursa Haber, ka qenë në agjendën e vizitave të delegacionit nga Malisheva, e ku janë pritur nga udhëheqësi i këtij grupi Cuneyt Dizdar, si dhe është vizituar edhe Federata e Rumelit, ku janë pritur nga kryetari i saj z.Selim Yedikardes. Në ët gjitha këto takime, është theksuar nevoja e bashkëpunimit mes bizneseve lokale nga Malisheva dhe bizneset ruke.

Vizita në Bursa, është përmbyllur me takimin vëllazëror me emigrantët nga Ballkani dhe në veçanti me emigrantët nga trojet shqiptare, të cilët janë të organizuar në shoqatën “Kosova Uskup Dernegi”.

Kryeministri në detyrë, Hashim Thaçi, thotë se të gjithë liderët politikë, të interesuar për ndërtimin e institucioneve të reja, të dala nga zgjedhjet e 8 qershorit, duhet të komunikojnë, të bashkëpunojnë, dhe të ndërtojnë një marrëveshje institucionale të qëndrueshme dhe stabile.

“Duhet të nxitohemi dhe të punojmë më shpejtë që të arrihet marrëveshja ndërpartiake sa më shpejtë që është e mundur dhe t’i përgjigjemi ftesës së Presidentes për një takim të përbashkët dhe të gjejmë formulën që është në përputhshmëri me interes të qytetarëve dhe vendimet e Gjykatës Kushtetuese”, ka deklaruar Thaçi.

Sipas kryeministrit Thaçi, asnjë lider nuk duhet të mendojë për interesat partiake ose personale, por duhet të punojnë me maturi të madhe për interesat e vendit dhe të qytetarëve.

Këto komente kryeministri në detyrë i ka bërë në pritjen e organizuar me rastin e pranimit të Komitetit Olimpik të Kosovës në Komitetin Olimpik Ndërkombëtar.

Komiteti për Politikë dhe Financa i Kuvendit të Komunës së Prizrenit, ka mbajtur mbledhjen e saj të rregullt, me ç’rast, ka shqyrtuar 11 propozime, të cilat ia ka rekomanduar Kuvendit të Komunës për t’i shqyrtuar në mbledhjen e saj, e cila do të mbahet më 30 tetor, e enjte, duke filluar nga ora 10, në objektin e “Shtëpisë së Bardhë”.

Kryesuesi i Asamblesë, Kujtim Gashi tha se në mesin e këtyre pikave, do të shqyrtohet edhe propozimi i DKRS-së, për ndryshimin e vendimit të KK-së, në lidhje me formen e menaxhimit të Klubit Futbollistik “Liria”, i cili do të kalojë nën menaxhimin e një trupi të ekspertëve sportiv, dhe do të mbështetet teknikisht, dhe financiarisht nga Komuna e Prizrenit,

“Gjithashtu, si propozime të rendësishme do të jenë edhe pikat; Raporti i Këshillit për Qendrën Historike të Prizrenit, Themelimi i Këshillit për fshatin Zym të Hasit, Plani komunal për efiçiencë të energjisë 2014-2020, Raporti i buxhetit për gjashtëmujorin e parë të vitit 2014, si dhe pika tjera, të cilat janë në interes të komunës, dhe qytetarëve të saj”, tha Gashi./PrizrenPress.com/

Forumi Transparenca nesër organizon debatin me temën “Siguria dhe masat ndëshkimore”. Debati në fokus do të ketë sigurinë në Komunën e Prizrenit.”Debati mbahet më 29 tetor 2014 (e mërkurë) me fillim në orën 12:00 në Kompleksin Evropa (salla e takimeve, kati i parë), Prizren”, njofton Forumi Transparenca.

Pjesëmarrës në këtë debat do të jenë përfaqësues nga Gjykata Themelore në Prizren, Prokuroria Themelore në Prizren, Policia Rajonale e Prizrenit, nga KKSB në Prizren dhe përfaqësues nga Drejtoria Komunale e Arsimit. Debati do të drejtohet nga gazetari Petrit Kryeziu, anëtar i Forumit Transparenca.Debati do të trajtojë çështjen e sigurisë në Komunën e Prizrenit sikurse edhe masat Ndëshkimore, me fokus, sigurinë në shkolla, kamerat e sigurisë, vjedhjet, armëmbajtjet pa leje sikurse edhe politikat ndëshkimore, statistikat nga veprat penale më të shpeshta gjatë këtij viti në Komunën e Prizrenit, etj.

Debati do të ketë një përballje mes pjesëmarrësve, anëtarëve të Forumit Transparenca dhe përfaqësuesve nga partitë opozitare në Prizren.

Forumi Transparenca është themeluar në mars të këtij viti, si përpjekje e koordinuar e akterëve të shoqërisë civile dhe mediave në Prizren, të cilët kanë për synim rritjen e nivelit të transparencës dhe llogaridhënies së qeverisë lokale të Prizrenit. Ky trup joformal përbëhet nga aktivistë të shoqërisë civile dhe gazetarë të Prizrenit, të cilët janë aktiv në fushën e qeverisjes demokratike./PrizrenPress.com/

Lëvizja Vetëvendosje ka reaguar ndaj një sondazhi të publikuar sot në media, i cili e nxirrte keq këtë subjekt politik, si pasojë e afrimit me Bllokun LAN, duke e cilësuar sondazhin fantom dhe lajmin të porositur.

“Gjatë ditës së sotme, në disa media elektronike është përhapur një lajm, se kinse Lëvizja Vetëvendosje ka bërë sondazh, rezultati i të cilit është më i ulët sesa ai i zgjedhjeve të 8 qershorit”, thuhet në reagimin VV-së.

Sipas VV-së, “rezultati” i këtij sondazhi fantom sugjeron se si lajm është porositur nga kundërshtarët politikë të Lëvizjes Vetëvendosje, të cilët e shpresojnë një rezultat të tillë.

“I sigurojmë edhe ata, por edhe gjithë opinionin publik se Vetëvendosje është më e fortë dhe më e vendosur se kurrë që në çfarëdo situate që të krijohet ta nxjerr Kosovën nga humnera politike dhe ekonomike në të cilën e ka hedhur qeverisja e deritashme”, përfundon reagimi i VV-së. /PrizrenPress.com/