Njohësi i proceseve politike në Maqedoni, profesori Arsim Sinani, ka thënë se Maqedonia nuk mund të ekzistojë si shtet pa shqiptarët.

Arsim Sinani, profesor doktor i Marrëdhënieve Ndërkombëtare, president i Qendrës për Marrëdhënie Ndërkombëtare dhe Studime Ballkanike, ligjërues në Universitetin e Tetovës, ka folur për situatën e fundit në Maqedoni dhe për zgjidhjen e çështjes të të drejtave të shqiptarëve në këtë shtet.

Në këtë intervistë për “Epokën e re”, ai gjendjen në Maqedoni e ka përshkruar të tensionuar, me probleme, pa dialog mes shqiptarëve dhe maqedonasve, pa dialog mes pozitës dhe opozitës, me një strategji të krizave të kontrolluara që, sipas tij, u ndihmon partive në pushtet ta kontrollojnë të gjithë këtë në favor të tyre, duke e shndërruar në fitore elektorale. Ai ka thënë se partitë politike shqiptare, pas protestave të Shkupit, e kanë humbur legjitimitetin në elektoratin shqiptar, edhe pse e kanë marrë votën e popullit në zgjedhjet e fundit. “Mendoj se janë harxhuar, por ky harxhim do të sjell pasoja pasi pushteti, siç thashë, i ka lodhur, i ka kënaqur, i ka sjellë në pozita që ta humbin kontaktin me votuesin shqiptar. Lidershipi shqiptar në Maqedoni lipset të jetë më i hapur për bashkëpunim me qytetarin sepse qytetari është ai që vendos për atë apo për këtë”, është shprehur Sinani.

Ai ka thënë se doktrina politike e Gruevskit është një doktrinë e cila ka këtë qëllim: “lodhjen e shqiptarëve në staza të gjata. Ai po e përdor një taktikë ftohtë-nxehtë me shqiptarët duke dashur t’i bëjë pesimistë, por realiteti është se kjo doktrinë çdo ditë e më shumë po fiton fuqi, por po i del ndryshku, ashtu siç ka filluar t’u dalë ndryshku përmendoreve në Shkup. Këtë betejë me shqiptarët ai e ka të humbur dhe këtë do ta kuptojë atë ditë që do të jetë në opozitë dhe do ta shohë se sa gabim e ka pasur kur ka menduar se shqiptarët mund të gjunjëzohen”, ka thënë Sinani.

Arsim Sinani ka thënë se Maqedonia nuk mund të ekzistojë si shtet pa shqiptarët. “Kjo është një çështje që e dinë vetë maqedonasit e sotëm, e di edhe faktori ndërkombëtar, e di edhe faktori global politik”, ka thënë Sinani. Ai ka thënë se lideri i BDI-së, Ali Ahmeti, si lider i shumicës shqiptare nuk u soll në raport me votën të cilën ia dha elektorati shqiptar në Maqedoni.

Efektivët e policisë që morën pjesë në aksionin e Lazaratit ende nuk e kanë marrë shpërblimin që iu është caktuar nga ana e qeverisë. Burime nga radhët e forcave blu sqarojnë se deri ditën e djeshme, lekët që iu janë premtuar pas operacionit të Lazaratit nuk iu kanë kaluar në llogaritë e tyre bankare. Vendimi për shpërblimin e punonjësve të policisë është miratuar nga Këshilli i Ministrave që në datën 9 korrik të këtij viti, por ende nuk është vënë në zbatim. Forcave të policisë iu premtua se brenda një jave nga ekzekutimi i këtij vendimi do t’u jepeshin edhe lekët, por që prej miratimit të këtij vendimi kanë kaluar dy javë dhe deri tani efektivët nuk i kanë marrë lekët që iu janë caktuar.

Qeveria vendosi që, çdo efektiv policie që ka marrë pjesë në këtë operacion, do të marrë shpërblim deri në dy paga mujore. Në total është caktuar një fond prej 100 milionë lekësh për punonjësit e policisë. Nga ana tjetër, e kontaktuar nga “Gazeta Shqiptare”, Ministria e Brendshme sqaron: “Është e vërtetë që lekët nuk u kanë kaluar punonjësve të policisë, por këtu nuk bëhet fjalë për vonesë, por është thjesht zbatimi i procedurave, që nga miratimi i vendimit në qeveri, deri në kalimin e lekëve në llogaritë e policëve. Por brenda kësaj jave lekët do u jepen, më saktë brenda këtyre tri ditëve”.
Vendimi

Në buxhetin e vitit 2014, miratuar për Ministrinë e Punëve të Brendshme për programin “Policia e Shtetit”, për mbulimin e shpenzimeve të operacionit të Policisë së Shtetit, të kryer në Lazarat, Gjirokastër, të shtohet fondi prej 165 428 500 (njëqind e gjashtëdhjetë e pesë milionë e katërqind e njëzet e tetë mijë e pesëqind) lekësh, i specifikuar, si më poshtë vijon:
a) Për shpërblimin e punonjësve të policisë të angazhuar në këtë operacion, 100 000 000 (njëqind milionë) lekë dhe masa e shpërblimit të jetë deri në dy paga mujore.
b) Për shpenzime të tjera “Mallra e shërbime”, 65 428 500 (gjashtëdhjetë e pesë milionë e katërqind e njëzet e tetë mijë e pesëqind) lekë”, citohet në vendimin e Këshillit të Ministrave