Në Fakultetin e Edukimit të Universitetit të Prishtinës “Hasan Prishtina” ka filluar punën Instituti për Hulumtim dhe Zhvillim të Arsimit. Shtyllat kryesore të këtij Instituti janë: hulumtimet shkencore në fushën e edukimit dhe trajnimi i mësimdhënësve që janë në shërbim.

Prodekani për mësim në Edukim, Zeqir Veselaj, ka thënë se ky Institut është themeluar duke pasur parasysh nevojat e mësimdhënësve për trajnime dhe hezitimin e tyre që të trajnohen nga OJQ të ndryshme siç është bërë deri më tani. Veselaj ka thënë se tashmë Instituti ka filluar punën e tij duke i trajnuar rreth 200 mësimdhënës për përvetësimin e anglishtes nga moshat e reja, meqë me kurrikulën e re parashihet që anglishtja të mësohet nga klasa e parë. “Prej aty ka lindur ideja, se është mirë që universiteti, respektivisht Fakulteti i Edukimit, ta formojë një departament, të cilin më vonë e quajtëm institut, i cili do të merrej me zhvillimin profesional të mësimdhënësve në vend që ato trajnime të kryhen nga OJQ”, ka thënë Veselaj për Epokën e re.

Sipas tij, ky institut do të shërbejë si hallkë lidhëse në mes të trajnimit të mësimdhënësve para shërbimit dhe atyre pas shërbimit. “Dy do të jenë shtyllat e punës së Institutit: e para, hulumtimet shkencore në fushën e edukimit për të parë ku janë ngecjet dhe komponenta e trajnimit të mësimdhënësve në shërbim”, është shprehur ai.

Trajnues të mësimdhënësve të shkollave fillore dhe të mesme do të jenë mësimdhënësit universitarë nga Fakulteti i Edukimit, por varësisht prej specifikave të trajnimit do të angazhohen edhe staf nga fakultetet e tjera.

Veselaj ka thënë se trajnimet do të ofrohen në bazë të kërkesave që kanë Drejtoritë Komunale të Arsimit (DKA). “Ne do ta shohim listën e nevojave të DKA-vë dhe do t’i ofrojmë trajnimet tona të licencuara nga MASHT-i. Pesë trajnimet e para kanë të bëjnë me zbatimin e kurrikulës së re, pra vlerësimi me nxënësin në qendër. Trajnimet që do të organizohen do të jenë sipas nevojave për zhvillim profesional”, është shprehur Veselaj.

Ai ka treguar se Instituti për Hulumtim dhe Zhvillim të Arsimit do të financohet nga Ministria e Arsimit, Shkencës dhe Teknologjisë (MASHT) dhe donatorët e ndryshëm. Projekti i parë i këtij instituti është financuar nga Ambasada Amerikane në Prishtinë. “Burim kryesor do të jetë buxheti që MASHT-i ua ndanë DKA-ve për zhvillim profesional të mësimdhënësve. Puna e mjeteve financiare nuk do të jetë kufizim sepse çdoherë ndahet buxhet për trajnimin e mësimdhënësve”, ka thënë Veselaj.

Paul McCartney ka folur për planet e tij të pensionimit, duke thënë se ai do të zbresë prej skene kur t’i teket.

“Përgjigjja në ‘A do të pensionohesh?’ është ‘Kur të ma do qejfi’. Por, kjo nuk do të ndodhë sot”.
Kështu ka deklaruar ish anëtari i Beatles, për Magazinën Rolling Stone.

Muzikanti dhe shkruesi i vargjeve në të njëjtën intervistë ka folur edhe për punën në turneun e tij aktual, duke thënë se ai preferon ta përziejë materialin e vjetër me atë të ri – për ta bërë secilin të lumtur.

“E përziejmë kohë pas kohe, por kryesisht shpresojmë që po kënaqim shtresat e ndryshme brenda publikut”.

“Njerëzit thonë ‘po përse e çan kokën, njeri?’ Dikujt, si Bob Dylan, nuk i ha palla – ai thjesht bën atë që do, dhe ajo është cool. Unë them: Po, por unë i kam do kujtime që më ndjekin nga koncertet në të cilat shkoja dhe incizimet që blija. Nuk dua që njerëzit në mes të publikut të mendojnë: ‘Hej, ne kemi ardhur për hite të mëdha, e ju luajtët mut’”.

McCartney tash së voni ka ri-prezantuar pesë prej klasikeve të tij, Wings dhe solo-albumet si aplikacione. Ato janë versione të “Band on the Run”, “McCartney”, “McCartney II”, “RAM” dhe “Wings Over America” që janë vënë në qarkullim përmes Apple si aplikacione për iPad.
Aplikacionet përfshijnë albumet origjinale si dhe një mori detajesh speciale dhe të materialit shtesë.

Më herët gjatë muajit Paul McCartney rinisi turin Out There, pasi kishte pushuar diku dy muaj, meqë e kishte kapur gripi.
A iu kishte thënë fansave më 5 korrik në New York: “Ndihem mrekullisht që jam kthyer” gjersa ia niste lojës treorëshe me “Eight Days a Week”.

Në maj McCartney ishte sëmurë dhe dërguar në spital në Tokio, Japoni. Për atë arsye, kishte anuluar një seri të shfaqjeve në Lubbock, Dallas, New Orleans, Atlanta, Jacksonville, Nashville and Lousville nga turi i tij “Out There”, që tani është riaranzhuar për muajin tetor.

Elaine Stritch, aktorja me zërin karakteristik që me aktrimin e vetë për 6 dekada e kishte pushtuar Broadwayn njujorkez dhe West Endin londinez ka ndërruar jetë mbrëmë në moshën 89 vjeçare.

Stritch, e cila disa herë ishte shpërblyer për rolet e saj në serialet televizive “30 Rock” dhe “Law and Order”, ka ndërruar jetë në shtëpinë e vetë në Miçigan (Detroit).

Me vite të tëra kishte vuajtur nga diabeti dhe kishte pasur probleme shëndetësore.

Elaine Stritch ka bashkëpunuar me kompozitorët më të njohur, nga Noel Coward i cili e kishte quajtur Stiçi deri tek Stephen Sondhajmi i cili e kishte kompozuar këngën që më vonë do të shndërrohet në letërnjoftimin e saj “The Ladies Who Lunch” nga mjuzikli “Company” i vitit 1970.

Interpretimi i saj nuk ishte gjëja e vetme që e kishte shndërruar në legjendë të Broadwayt. Dinte të ishte e zhurmshme, këmbëngulëse dhe e zemëruar. Në maj të vitit të kaluan në një intervistë me Alec Baldwin ajo ishte pajtuar se ka ditur të bëhet këmbëngulëse. Ajo e kishte luajtur nënën e Baldwinit në “30 Rock”.

“Dua që të flitet për mua, të shkruhet për mua. Dua që çdo gjë të lidhet me mua”, kishte thënë për Hollywood Reporter vitin e kaluar.

Në vitin 2003 ajo ishte shpallur një prej simboleve të gjalla të Nju Jorkut. 10 vite më vonë pati deklaruar se më nuk ka energji për të jetuar në Nju Jork dhe ishte kthyer në Miçigan.

Elaine Stritch për herë të parë në Nju Jork kishte shkuar në vitin 1944 kur ishte vetëm 17 vjeçe. Menjëherë ishte dashuruar me skenën. Shkollën e aktrimit e kishte përfunduar në një klasë me Marlon Brandon dhe me Walter Matthaun.

Edhe pse nuk kishte potencial t‘i këndonte të gjitha zhanret e këngëve, fansat thonë se zëri i saj ishte specifik për të përçuar emocion.

Kur mjuzikli “Company” e kishte përfunduar jetën artistike në Broadway, Stritch e kishte zhvendosur në Londër ku i kishte kaluar 13 vitet e saj. Gjatë kësaj kohe, ajo martohet me aktorin John Bay, i cili vdes në vitin 1982, pas 10 vjetëve martese.

Në një rast ajo kishte folur me sinqeritetin më të madh për luftën që e kishte me alkoolin, kur e kishte pranuar se kishte pirë para çdo dalje në skenë.

“Kam pirë sepse kisha frikë për mundësitë dhe talentin tim”, kishte deklaruar për Nju Jork Times në vitin 2002.

“E dija se kisha talent por nuk dija si ta tregoja. Për këtë më ka ndihmuar alkooli”, kishte thënë Elaine.