Edhe pse rreziku nga ethet hemorragjike është më i vogël se vitet e kaluara, qytetarëve u bëhet apel që edhe më tutje të vazhdojnë të kenë kujdes, sidomos në zonat Malishevë, Rahovec, Suharekë dhe Klinë.

Kjo thirrje u bë sot nga Këshilli Ndërministror për parandalimin dhe luftimin e etheve hemorragjike Krime Kongo.

Gjatë këtij takimi, sipas një njoftimi për media të Ministrisë së Shëndetësisë, u tha se përkundër thumbimeve të shumta të rriqrave në zonat endemike, numri i rasteve pozitive në këtë sëmundje për këtë vit është pesë, që është numër më i vogël se në të njëjtën periudhë të vitit të kaluar.

Po ashtu, u raportua për përfundimin e procesit të spërkatjes selektive nga ajri të disa zonave në komunën e Malishevës, procesin e dezinsektimit dhe masat e tjerra të ndërmarra nga autoritetet qendrore dhe ato lokale, në ballafaqimin me këtë problematikë.

Janë caktuar vendet ku do të ulen deputetët sipas përkatësisë së grupeve parlamentare.

Koha.net merr vesh se deputetët e PDK-së do të ulen në anën e majtë të sallës, përballë vendeve për kabinetin qeveritar dhe drejtuesit e seancave, në mes LDK-AAK-Nisma dhe djathtas Vetëvendosja me deputetët e pakicave.

Ja edhe vendimi i nënshkruar nga kryeparlamentari në detyrë, Jakup Krasniqi.

Mospajtimet mes subjekteve politike, dhe insistimi i dy blloqeve si PDK-së, por edhe koalicionit LDK, AAK e NISMA se atyre u takon kryeparlamentari, do të sjellë një situatë ku presidentja e vendit Atifete Jahjaga duhet të ndërhyj në bazë të kompetencave kushtetuese.

Një analizë/dokument që flet për rolin e Jahjagës në këtë situatë, po qarkullon nëpër misionet diplomatike të akredituara në Prishtinë.

Radio Dukagjini e ka parë dokumentin në fjalë, ndërsa aty parashihet ndërhyrje a presidentes për ta ruajtur stabilitetin e vendit pas polemikave rreth seancës konstituive.

“Presidenti, në këtë rast Atifete Jahjaga, ndër të tjera, ka obligim kushtetues që ta bëjë gjithçka në fuqinë e saj që ta ruajë unitetin e popullit si dhe të garantojë funksionimin e institucioneve të shtetit. Këto dy përgjegjësi janë të precizuara me nenin 83 që thotë: ‘Presidenti është kreu i shtetit dhe përfaqëson unitetin e popullit të Republikë së Kosovës’ dhe me nenin 84.2 që thotë se Presidenti ‘garanton funksionimin kushtetues të institucioneve të përcaktuara me këtë Kushtetutë’”, thuhet ndër të tjera në analizë.

Aty parashihet qartë edhe mundësia e eskalimit të situatës të enjten në Kuvend që mund të qoj edhe deri në konfrontim fizik mes deputetëve.

Këtë madje e ka paralajmëruar edhe deputeti i zgjedhur nga LDK-ja, Arben Gashi.

“Nëse dy palët pretendojnë të ulen me një vend, normalisht që do të ketë fërkime”, ka thënë Gashi.

Analiza është marr konkretisht me këtë çështje derisa konfirmon se konfrontimi fizik mes deputetëve mund të ndodhë.

“Mospajtimet aktuale rreth rendit të ulëseve gjatë seancës konstituive, që e bartin potencialin serioz që të eskalojnë në një konflikt fizik, paraqesin kërcënim serioz dhe potencial për cenuar unitetin e popullit të Kosovës si dhe kërcënim për funksionimin e institucioneve. Kjo, po ashtu, do të shënonte një precedent të keq, një rrënim të imazhit të Kosovës dhe rrezikim të perspektivës evropiane të Kosovës”, vlerësohet në letër.

Aty po ashtu rekomandohet se si mund të tejkalohet kjo situatë.

“Mospajtimet rreth interpretimit të Kushtetutës dhe rregullores së punës rreth procedurave të aplikueshme në seancën konstituive do të mund të tejkaloheshin nëse çështja referohet në Gjykatën Kushtetuese, pasi që, deri në vendimin e Gjykatës, do të shtyhej mbajtja e seancës konstituive. Në këtë situatë është obligim kushtetues i Presidentit që, në emër të ruajtjes së unitetit të popullit, stabilitetit institucional, garantimit të kushtetutshmërisë dhe ruajtjes së imazhit të Kosovës, që çështjen e Kryeparlamentarit ta referojë në Gjykatën Kushtetuese”, thuhet në fund të dokumentit.

Ndërkohë, nga presidenca kanë bërë të ditur se e para e shtetit do të ndjek të gjitha veprimet kushtetuese në secilin situatë politike.

“Presidentja Jahjaga, në përputhje me kompetencat e saj kushtetuese, do të veprojë në pajtim me ligjin dhe Kushtetutën, duke garantuar funksionimin demokratik të institucioneve dhe siguruar unitetin e popullit”, ka thënë këshilltari i lartë i presidentes, Arbër Vllahiu.

Ramush Hardinaj ka folur pas takimit me minoritetet jo serbe. AI ka thënë që nuk është arritur marrëveshja me lëvizjen Vetëvendosje.

Ai tha që shkak për këtë është sjellja e një dokumenti të ri nga VV-ja , me anekse, që e ka kthyer krejt procesin gati në fillim.

Haradinaj konfirmoi se do të ketë sot pasdite një takim me udhëheqësit e lëvizjes Vetëvendosje.

Sa i përket minoriteteve jo-serbe, tha se me to kanë përafrime në qëndrime.

Haradinaj, Isa Mustafa e Fatmir Limaj ende janë në selinë e AAK-së.

Lëvizja Vetëvendosje ka paralajmëruar bllokun opozitar LDK-AAK-NISMA, se në rast se nuk arrijnë marrëveshje me ata, atëherë për pasoj do të kemi një qeveri Thaçi 3, por pa Hashim Thaçin si kryeministër të Kosovës.

“Marrëveshja e koalicionit LDK-AAK-Nisma me Lëvizjen VETËVENDOSJE! e bën prerjen kualitative të Qeverisë së re me Qeverinë Thaçi 2. Përndryshe, kemi Thaçi 3 pa Thaçin. Kjo do të ishte situata e përsosur për Thaçin: vazhdon orientimi i tij (pazaret me Serbinë, privatizimet neoliberale) pa përgjegjësisë për të”, ka njoftuar VV-ja përmes llogarisë zyrtare të rrjetit social Facebook.

Partia Demokratike e Kosovës tashmë është në përgatitje të skenarit për ditën e enjte, kur pritet edhe të mbahet seanca konstituive e Kuvendit të Kosovës. Burime të Gazetës Blic brenda PDK-së kanë thënë se juristët e PDK-së, në krye me Arsim Bajramin janë në përgatitje të skenarit se si duhet të shkoj seanca konstituive e Kuvendit të Kosovës.

Sipas këtij burimi, ky grup i juristëve është duke e përgatitur Flora Brovinën se si duhet të sillet ditën e enjte. “Flora Brovina sipas këtij skenari do të duhet që PDK-në ta ftoj që të propozoj emrin e kandidatit për kryetar Kuvendi. Grupi i juristëve të PDK-së do të thirren në atë se ata janë grupi më i madh parlamentar, që kanë dalë nga zgjedhjet e 8 qershorit”, ka thënë ky burim.

Si bazë tjetër juridike, ku po thirren juristët e PDK-së është edhe vendimi i Gjykatës Kushtetuese të Kosovës, i cili sipas tyre nuk i njeh koalicionet parazgjedhore. “Poashtu do të thirren edhe në një dokument, që ka të bëjë me interpretimin juridik të procedurave dhe rregullave gjatë seancës konstituive të Kuvendit të Kosovës, i cili dokument Grupit Parlamentar i referohet grupit më të madh që ka dalë nga zgjedhjet”, ka thënë ky burim i Gazetës Blic.

Gazeta Blic ka raportuar edhe të shtunën për tendencat e PDK-së që të thirren në këtë dokument, i cili sic mësohet është hartuar nga njerëz të administratës së UNMIK-ut.

Sipas këtij burimi, Flora Brovina do të tentoj që t’i ikë agjendës se si e ka përcaktuar kryesia e vjetër e Kuvendit ditën e shtunë, kur kryeministri në largim, Hashim Thaçi e braktisi seancën.

Në seancën e Kryesisë së vjetër të Kuvendit është marrë vendim që Grupi Parlamentar LDK- AAK- Nisma është më i madh me 47 deputetë, i pasur nga PDK me 37 deputetë. Poashtu në këtë seancë është vendosur që kryesuesja e seancës konstituive, që është deputetja më e vjetër, pra Flora Brovina të mos e ketë të drejtën që t’i ikë agjendës së përcaktuar nga kryesia.

Flora Brovina, para disa ditësh kishte thënë për mediet se PDK-së do t’ia jap të drejtën që të propozoj kandidatin për kryetar të Kuvendit të Kosovës.

Ndërkohë, nënkryetari i AAK-së, Ardian Gjini dje në një intervistë që e ka dhënë për mediet ka thënë se në rast se Flora Brovina nuk i përmbahet agjendës së Kryesisë së vjetër të Kuvendit ajo rrezikon që ta humb mandatin e deputetes.

Sidoqoftë, analistët politik parashohin mundësinë e përplasjeve në këtë seancë, kur pritet të zgjedhet edhe kryeparalmentari. Madje, nuk është përjashtuar edhe mundësia e përplasje fizike ndërmjet deputetëve të PDK-së dhe atyre të bllokut LDK- AAK- Nisma.