Gjykata Themelore në Prizrenit, ka vendosur që të mbajë në paraburgim të dyshuarin për kultivim të hashashit, Sejdi Bashën.

“I pandehuri do të mbahet në paraburgim prej 1 muaji i cili do të llogaritet prej datës 20.07.2014 dhe do të zgjasë deri me datën 20.08.2014, gjatë së cilës kohë pritet që i pandehuri të dalë në gjykim para Departamentit për Krime të Rënda të Gjykatës Themelore”, tha zëdhënësja e Gjykatës Themelore në Prizren, Afërdita Kicaj.

Sipas saj, Basha dyshohet se ka kultivuar bimë narkotike,hashash dhe kanabis.

“Gjatë bastisjes në shtëpinë e tij janë gjetur 164 paketime të substancës narkotike”./PrizrenPress.com/

Zyra e Presidentes, Atifete Jahjaga u është përgjigjur disa paralajmërimeve të kandidatit të bllokut LDK, AAK dhe Nisma për kryeministër, Ramush Haradinaj në lidhje me çështjen e nominimit të mandatarit për formimin e qeverisë së ardhshme.

“Duke kërkuar nga të gjitha palët vetëpërmbajtje nga presionet politike, Zyra e Presidentes thekson se kandidati për kryeministër do të nominohet, në respektim të kushtetutshmërisë dhe ligjshmërisë dhe bazuar në vendimin e Gjykatës Kushtetuese për vlerësimin e përputhshmërisë së nenit 84 (14) dhe nenit 95, si dhe në pajtim me procedurat dhe afatet e parapara me Kushtetutë”, thuhet në reagimin e Zyrës Jahjagës.

Zyra e Presidentes “rithekson faktin se vendimet e Gjykatës Kushtetuese janë të obligueshme për të gjitha institucionet e vendit dhe se do t’i zbatojë me përpikëri ato”.

Sqarimet nga Presidenca pasuan deklaratën e Haradinajt ku thuhej se presidentja po rrezikon ta shkel kushtetutën.

“Ka mundësi që ne ta pyesim Gjykatën Kushtetuese a ka vepruar drejtë Presidentja që nuk e ka ushtruar të drejtën e vetë për ta nominuar mandatarin, pasi që ka ndodhë seanca. Presidentja po rrezikon që ajo vetë të shkelë kushtetutën”, kishte deklaruar Haradinaj.

Ai e kishte paralajmëruar Jahjagën se veprimi i bllokut LDK, AAK dhe Nisma mbetet çështje e hapur, në rast se ajo nuk e shfrytëzon kohën për nominimin e mandatarit./Rel/

Ambasadorja amerikane, Tracey Ann Jacobson iu ka bërë thirrje liderëve politikë të vendit që me angazhimet e tyre të dëshmojnë se dinë të respektojnë sundimin e ligjit në Kosovë, ashtu siç e dëshmuan me mbarëvajtjen e zgjedhjeve të 8 qershorit.

“Ne duhet t’i shohim të gjitha mbarëvajtjet e ngjarjeve që kanë ndodhur. E para në Kosovë kemi pasur zgjedhje të suksesshme, pastaj kemi pasur një kërkesë nga presidentja ku ka kërkuar sqarime nga Gjykata Kushtetuese për caktimin e mandarit për formimin e qeverisë, ndërsa tani e kemi edhe një pyetje shtesë për Gjykatën Kushtetuese. Duhet ta presim përfundimin e gjithë kësaj. Unë mendoj që kjo është një mbarëvajtje e zakonshme në një demokraci të re”, ka thënë ajo, transmeton RTK.

Sipas saj, “duhet të përballemi me këtë sepse nuk po flasim vetëm për katër vitet e ardhshme apo për themelimin e qeverisë dhe kuvendit për katër vitet e ardhshme, por, për vendosjen e një precedenti për të ardhmen e vendit”.

“Unë do të doja t’ju bëj ftesë të gjitha institucioneve, liderëve politikë që të tregojnë se e respektojnë sundimin e ligjit dhe të njëjtin përkushtim ndaj kushtetutës së vendit dhe vizionin e njëjtë siç e kanë treguar me mbarëvajtjen e suksesshme të zgjedhjeve edhe në këtë proces, përderisa po shkojmë drejtë themelimit të qeverisë dhe të Kuvendit. Mendoj se hapi i parë është që të presim vendimin e kushtetutës e të shohim pastaj çfarë hapash duhet të ndërmerren”, ka theksuar ambasadorja e SHBA-së, Jacobson.

Komiteti drejtues i projektit të TC “Kosova e Re” njoftoi sot se, me kërkesë të investitorëve, do ta shtyjnë afatin e dorëzimit të ofertave në tenderin për ndërtimin e këtij Termocentrali deri më 15 shtator. Por kësi lloj vendime sipas Lëvizjes Vetëvendosje, nuk duhet të merren nga qeveria në ikje, siç thonë ata.

“Pas nënshkrimit të kontratës me Konsorciumin Bechtel dhe Enka, kjo qeveri në ikje deri në moskthim, vazhdon të marrë vendime për çështjet e rëndësisë strategjike për vendin, vendime këto të cilat as një qeveri fuqiplotë nuk do të duhej t’i ndërmerrte pa e arritur konsensusin mbarëshoqëror. Dhe prapë sikur me autostradën për Shkup, kjo qeveri në ikje po e shfrytëzon orientimin e opinionit publik drejt zhvillimeve tjera politike për t’i kontrabanduar në heshtje vendimet e veta të dëmshme për të ardhmen e vendit”, thuhet në një reagim të tyre.

Lëvizja Vetëvendosje e kundërshton këtë projekt termocentrali, ndërtimi i të cilit sipas tyre bëhet kryekëput në kapital privat.

“Strategjia për energji dhe politikat e saj duhet të kenë qasje shumë më serioze se sa kjo që e kemi parë nga qeveria në ikje, apo cilado qeveri e pas luftës. Qasja karshi sektorit të energji duhet të jetë gjithëpërfshirëse, e jo kështu e parcializuar duke u bazuar në interesat partikulare herë të qeveritarëve e herë të investitorëve”, thuhet më tutje në reagimin e kësaj lëvizje.

I tërë ky proces i tenderimit për kapacitetet e reja gjeneruese të energjisë elektrike, sipas Lëvzijes Vetëvendosje, ka qenë i përcjellë me shkelje të shumta dhe mungesë transparence.

“TC Kosova e Re, në mënyrën siç është konceptuar së fundi, bie ndesh me Strategjinë për Energji dhe vendimet e Kuvendit të Republikës së Kosovës. Projekti është ndryshuar disa herë në dizajn. Komiteti drejtues asnjëherë nuk i ka publikuar termat e referencës për të treguar se çfarë teknologjie kërkojnë që të përdoret në termocentralin e ri. Cila do të jetë kostoja e prodhimit të energjisë në këtë termocentral dhe rrjedhimisht cili do të jetë efekti i tij në çmimin e energjisë për qytetarët e vendit? Cilat janë planet për zhvendosjen e popullatës nga kjo pjesë e Kosovës ku do të ndërtohet termocentrali dhe nga sipërfaqja e minierës së linjitit, etj? Gjatë procesit të parakualifikimit ka pasur shumë lëvizje të të interesuarve, disa duke hequr dorë fare e të tjerët duke krijuar konsorciume të reja”, thuhet më tutje në reagimin e Vetëvendosjes.

Shkelje të njëjta sipas Vetëvendosjes, janë bërë edhe me procesin e privatizimit të KEDS-it dhe procesin e privatizimit të PTK-së, ku për secilën ka pasur vetëm nga një ofertues.

Kryetari i Prizrenit, Ramadan Muja pas shumë vitesh është hapur sot për media. Ai për herë të parë ka ftuar gazetarët që të marrin pjesë në mbledhjen e drejtorëve të Ekzekutivit.

Në këtë mbledhje drejtorët e Mujës kanë marrë vendim për realizimin e 28 projekteve në infrastrukturë.

Ramadan Muja është hapur pas kërkesës së Forumit “Transparenca”.Hapja e mbledhjeve është vlerësuar pozitive edhe nga gazetarët/PrizrenPress.com/

Pas takimit të sotëm të mbajtur midis tre liderëve të koalicionit LDK-AAK-Nisma, i pari i Nisma për Kosovën, Fatmir Limaj, ka bërë të ditur se po vazhdojnë konsultat me grupet punuese, e gjithashtu po vazhdojnë edhe diskutimet me Vetëvendosjen për përafrim të mëtutjeshëm qëndrimesh, në mënyrë që të vazhdojnë me hapa konkret drejtë formimit të institucioneve të reja.

Duke mos dashur të komentojë shumë rreth idesë për paraqitjen e Jahjagës në Gjykatën Kushtetuese, në rast se ajo bën shkelje kushtetuese duke e vonuar nominimin e mandatarit, ai ka thënë se secilit person që e shkelë kushtetutën do t’i duhet të përballet me pasojat e veprimeve të veta.

Në anën tjetër, për sa i përket Vetëvendosjes, Limaj ka deklaruar se ende po bisedohet për përafrime të mëtejshme, dhe ka thënë se ka ende kohë për bisedime, përafrime dhe një marrëveshje eventuale.

Zyra e Presidentes, Atifete Jahjaga u është përgjigjur disa paralajmërimeve të kandidatit të bllokut LDK, AAK dhe Nisma për kryeministër, Ramush Haradinaj në lidhje me çështjen e nominimit të mandatarit për formimin e qeverisë së ardhshme.
“Duke kërkuar nga të gjitha palët vetëpërmbajtje nga presionet politike, Zyra e Presidentes thekson se kandidati për kryeministër do të nominohet, në respektim të kushtetutshmërisë dhe ligjshmërisë dhe bazuar në vendimin e Gjykatës Kushtetuese për vlerësimin e përputhshmërisë së nenit 84 (14) dhe nenit 95, si dhe në pajtim me procedurat dhe afatet e parapara me Kushtetutë”, thuhet në reagimin e Zyrës Jahjagës.

Zyra e Presidentes “rithekson faktin se vendimet e Gjykatës Kushtetuese janë të obligueshme për të gjitha institucionet e vendit dhe se do t’i zbatojë me përpikëri ato”.

Sqarimet nga Presidenca pasuan deklaratën e Haradinajt ku thuhej se presidentja po rrezikon ta shkel kushtetutën.

“Ka mundësi që ne ta pyesim Gjykatën Kushtetuese a ka vepruar drejtë Presidentja që nuk e ka ushtruar të drejtën e vetë për ta nominuar mandatarin, pasi që ka ndodhë seanca. Presidentja po rrezikon që ajo vetë të shkelë kushtetutën”, kishte deklaruar haradinaj.

Ai e kishte paralajmëruar Jahjagën se veprimi i bllokut LDK, AAK dhe Nisma mbetet çështje e hapur, në rast se ajo nuk e shfrytëzon kohën për nominimin e mandatarit.