Një gjykatë egjiptiane ka dhënë dënim me vdekje për 10 të akuzuar dhe dënime me burgim të përjetshëm për 37 të tjerë, përfshirë tre udhëheqës të lartë të Vëllazërisë Myslimane, të nxjerrë jashtë ligjit, raporton VOA.

Gjykatësi lexoi vendimin me zë të lartë dhe të shtruar, mes kundërshtimeve të të akuzuarve. Ai dënoi 10 vetë me vdekje dhe dha urdhër që 37 të tjerë të dënohen me burgim të përjetshëm. Tre udhëheqës të lartë të Vëllazërisë Myslimane të dënuar me burgim të përjetshëm përfshijnë udhëheqësin shpirtëror, Mohamed Badie.

Të pranishmit në sallë, avokatët e të pandehurve dhe shumë prej të akuzuarve u përpoqën të pengojnë leximin e dënimit nga gjykatësi duke thirrur me zë të lartë. Vendimi i gjykatësit të distriktit Shoubra të Kajros do të apelohet tani në një gjykatë të shkallës më të lartë.
Cështja përfshin akuza për dhunë në një provincë në veri të Kajros gjatë protestave të korrikut kundër ish-presidentit islamik Mohamad Morsi. Disa njerëz gjetën vdekjen dhe shumë u plagosën, përveç vandalizmit gjatë përleshjeve.

Kryegjykatësi Hassan Farid fajësoi të pandehurit për dhunën dhe tha se ata vepruan të nxitur nga motive terroriste. Vetë Vëllazëria Myslimane u nxor jashtë ligjit në fillim të vitit pasi qeveria e shpalli grup terrorist.

Në faqen e saj në arabisht, të titulluar Ikhwan Online, Vëllazëria Myslimane dënoi ndëshkimet dhe tha se “10 të pafajshëm po dënohen me vdekje”.

Sociologu Said Sadek vëren se ndëshkimet u dhanë në një kohë që qeveria ka ngritur çmimet e naftës, një fakt që ka larguar vëmendjen e publikut nga ky proces gjyqsor.
Sadek tha se ky nuk është gjyqi i parë që zhvillohet në këtë formë. Ai thotë për Zërin e Amerikës se “pjesa më e madhe e egjiptianëve janë mësuar me procese të tilla”.

Analisti politik thotë se kritikat e Perëndimit ndaj proceseve të tilla janë të shtrembëruara, veçanërisht kur vetë shumë vende perëndimore kanë marrë masa të forta për të luftuar atë që e konsiderojnë si terrorizëm të brendshëm.

“Eshtë për t’u çuditur se si Perëndimi përdor standarde të ndryshme kur është fjala te terrorizmi. Kur goditen nga terrorizmi ata bëhen gati të veprojnë, qoftë edhe me masa përtej parametrave ligjorë. Kur Egjipti vepron për t’u vetëmbrojtur nga fati i vendeve fqinje si Iraku, Libia, Somalia, Siria, fillojnë kritika ndaj sistemit gjyqësor egjiptian”.
Një numër procesesh gjyqësore në Egjipt gjatë vitit të fundit, përfshirë procesin kur gjykatësi dha dënim me vdekje për qindra të akuzuar, janë përcjellë me reagim të fortë nga Perëndimi. Duket se ekzekutimet janë shtyrë për një kohë të pacaktuar dhe nuk është e qartë nëse dënimet do të zbatohen.
– See more at: http://politiko.net/denim-vdekje-per-10-te-akuzuar-ne-egjipt/#sthash.95j1GU7R.dpuf

Presidenti Petro Poroshenko urdhëroi ushtrinë për të ngritur flamurin e Ukrainës mbi ndërtesën e këshillit të qytetit të Slovianskit. Shtrirja e kontrollit të forcave të Ukrainës mbi qytet mbetet e paqartë, por disa raporte citojnë se ky rikthim i forcave vendase në Ukrainën lindore po ndodh sepse separatistët po evakuohen.

Ministri i Brendshëm Arsen Avakov, tha në rrjetin social Facebook se një numër i madh kryengritësish u larguan nga Slovianski sepse u dorëzuan përballë forcave të Ukrainës. Ai gjithashtu përmendi dhe largimin e komandantit ushtarak të Republikës së vetëshpallur të Donetskut, Igor Strelkov, por kjo ende pret një konfirmim zyrtar nga policia. Por, nga ana tjetër, separatistët pro-rusë kundërpërgjigjen dhe i mohojnë raportimet se janë larguar nga bastioni i tyre në Sloviansk.

Forcat e Ukrainës filluan një ofensivë kundër separatistëve këtë javë, pas ndërprerjes së armëpushimit 10-ditor. Megjithatë, presidenti i Ukrainës, Petro Poroshenko, u shpreh i gatshëm të rivendosë armëpushimin me separatistët pro-rusë, nëse ky vendim do të respektohej nga të dyja palët, transmeton TCH. Presidenti ukrainas ka kërkuar gjithashtu lirimin e të gjithëve pengjeve dhe kontroll mbi kufirin mes Ukrainës dhe Rusisë me monitorim nga ana OSBE-ja. Kjo marrëveshje pret konfirmim dhe nga pala ruse, por më herët në një deklaratë të Vladimir Putinit ai tha se ishte “thellësisht i shqetësuar për rritjen e vdekjeve të pjesës civile dhe rritje të lartë të emigranteve që hyjnë në Rusi nga jug-lindja e Ukrainës”.

Ndërkombëtarët ranë dakord se Organizata për Siguri dhe Bashkëpunim në Evropë (OSBE) duhet të luajë një rol më aktiv në monitorimin e situatës në zonën e konfliktit. Aksioni i ndërmarrë nga presidenti Poroshenko ka fituar vëmendjen edhe të gjithë medieve nga bota, të cilët pa ndërprerë po raportojnë për më të rejat rreth luftimeve në mes ushtrisë ukrainase dhe forcave separatiste, që gjatë këtyre muajve të fundit kanë krijuar rrëmujë në vend.

Për organizatorët kjo është një mënyrë për të treguar se shqiptarët, të konsideruar gjithmonë kaq të vegjël, janë mjaftueshëm të mëdhenj për të bërë që zëri i tyre të ndihet edhe këtu në zemër të vendit më të fuqishëm në botë.

“Kjo paradë bashkon shqiptarët jo vetëm në Shtetet e Bashkuara por në të gjithë botën dhe kjo paradë ka shumë rëndësi, sepse siç e shihni shumica janë të rinj që janë rritur këtu në Amerikë dhe ne me këtë paradë mundohemi t’u japim atë patriotizëm shqiptar që të ndihen krenarë që janë shqiptarë e që këtu në Amerikë t’i thonë gjithë botës që janë shqiptarë”, u shpreh Marko Kepi.

“Ne kemi parulla për Çamërinë, për Maqedoninë, kemi parulla për Malësinë, e të tjera, por sidomos për Kosovën. Ta dinë të gjithë që ne jemi bashkë, nuk jemi katër shtete. Ne e dimë, por duam që edhe bota ta dijë”, tha organizatori tjetër Besmir Hoxha.

Në këtë paradë janë dorëzuar edhe çmime të veçanta, mes të cilëve Mark Gjonaj, anëtari demokrat i asamblesë së Nju Jorkut dhe gazetari i Top Channel Marin Mema, për kontributin në ruajtjen dhe promovimin e vlerave kombëtare. Gjonaj e Mema ishin gjithashtu edhe marrshallët e nderit të kësaj parade.

Një rrugëtim mes shqiptarëve, takime të ndryshme, karaktere dhe personazhe që japin kaq shumë për Shqipërinë edhe pse në krahun tjetër të botës. / TCh/