Arrestohet Vullnet Ferizi nga Drenasi, i dyshuar për vjedhje në shtëpinë e një qytetari nga fshati Lubizhdë në Malishevë.

“Hetues policorë nga Stacioni Policor në Malishevë, kanë arritur që t’i bien në fije dhe ta arrestojnë të dyshuarin Vullnet Ferizi nga një fshat i Drenasit pasi që ekziston dyshimi i bazuar se i njëjti me datën 28 prill kishte depërtuar me forcë në shtëpinë e një qytetari me mbiemër Paçarizi nga fshati Lubizhdë, me ç’rast përpos demolimit të shtëpisë, nga aty kishin vjedhur stoli të arta, disa telefona, një lap-top, një IPad dhe një video kamerë”, njofton policia ne Prizren.

Gjatë intervistës, i dyshuari ka shfrytëzuar të drejtën për t’u mbrojtur në heshtje, ndërkaq sipas raporteve hetimore, i njëjti është duke u hetuar edhe për raste tjera.

Me urdhër të prokurorit të shtetit i dyshuari ndalët nën masën e arrestit policor. /PrizrenPress.com/

Dy viktima femra në dy raste të ndara, me datën 18 qershor, kanë denoncuar në polici raste të shantazhit dhe fotografimit të pa autorizuar, njofton Policia në Prizren.

Rasti i parë është paraqitur nga një femër e cila ka informuar policinë se një i dyshuar i kishte shkruar mesazhe në telefon me të cilat i bënte shantazh të njëjtës se nëse ajo nuk pranon që të ketë lidhje dashurie me te, ai do t’i publikonte disa incizime komprometuese për viktimën. Ndërkaq viktima e ka kërkuar ndihmën e policisë dhe pas hetimeve fillestare është gjetur i dyshuari i cili gjatë intervistës i ka thënë policisë se nuk posedon kurrfarë incizimi por kishte pasur për qellim të sigurojë për vete favore seksuale.

Lidhur me rastin është informuar prokurori i cili ka sugjeruar që i dyshuari të ndiqet penalisht sipas procedurës së rregullt.

Ndërsa rasti i dytë ka të bëjë me një të dyshuar mashkull i cili pa lejen e ish të fejuarës së tij që tanimë nuk janë bashkë, ka postuar në “Facebook” fotografi komprometuese të viktimës me qellim të dëmtimit të nderit dhe autoritetit të saj. Pasi është informuar prokurori i shtetit, është vendosur që i dyshuari të arrestohet dhe të ndalët në mbajtje për 48 orë sepse ekziston dyshimi i bazuar se i njëjti ka konsumuar elemente të veprës penale “Fotografim dhe incizim i paautorizuar”. /PrizrenPress.com/

Lideri i AAK-së, Ramush Haradinaj ka thënë se ende s’janë marrë vesh për të gjitha detajet me partitë tjera që pritet të themelojnë Qeverinë e re.

Megjithëkëtë, mirëpritësi i takimit të liderëve të opozitës ka thënë se ka përfarim të qëndrimeve mes të gjitha partitë politike.

“Janë përafruar qëndrimet”, ka thënë Haradinaj, pas takimit me Kurtin, Mustafën dhe Limajn, raporton Express.

Ai ka thënë se askush në Kosovë nuk është kundër dialogut, por ka thënë se duhet të ketë dialog frytdhënës.

Kryeministri i Serbisë, Aleksandar Vucic thotë se në javën e ardhshme, bashkë me kryetarin Tomislav Nikolic, do të bisedojë me përfaqësues të serbëve të Kosovës.

Temë bisedash, siç është njoftuar, do të jetë situata pas zgjedhjeve parlamentare në Kosovë.

Vucic në konferencën për gazetarë ka thënë se tashmë ka biseduar me disa nga përfaqësuesit e serbëve të Kosovës dhe se në javën e ardhshme do t’i ftojë ata përfaqësues në Beograd.

Vuçiq ka thënë, njofton B92, transmeton Tribuna, se nga serbët do të dëgjohen kërkesat e tyre dhe mënyra se si ata e shohin të ardhmen.

Është e nevojshme të gjejmë emëruesin e përbashkët duke u prirë nga nevojat e serbëve që jetojnë në Kosovë, ka thënë.

Vucic, duke u përgjigjur në pyetje, ka shtuar se vazhdimi i dialogut në Bruksel varet nga formimi i Qeverisë së Kosovës.

Evidencohen vonesa në jetësimin e Strategjisë nacionale për luftimin e etheve hemorragjike në Malishevë. Të mërkurën ka filluar spërkatja e stallave, punë që kryhet nga Agjencia e Veterinës dhe Ushqimit e Kosovës.

Ky aksion ka filluar në fshatin Shkozë dhe sipas drejtorit të Drejtorisë për Mbrojtje dhe Shpëtim në Komunën e Malishevës, Ahmet Morina, spërkatja e stallave dhe bagëtive do të bëhet çdo ditë në nga një fshat. “Ne si komunë jemi në mbikëqyrje të projektit“, ka bërë me dije Morina për Kohën Ditore. AVUK-u, sipas drejtorit të Drejtorisë së Shëndetësisë në Komunën e Malishevës, Hajdin Berisha, ishte paraparë të fillojë me spërkatje kah fundi i muajit maj, por është vonuar ta bëjë këtë me kohë. Berisha ka thënë të mërkurën se sipas informatave që posedon vonesa ka ndodhur për shkak të problemeve që kanë dalë në procedurat e tenderimit në AVUK.

Ndërkohë është vonuar edhe fillimi i spërkatjes nga ajri me aeroplanë, që ishte planifikuar të fillonte në javën e parë të muajit qershor. Kjo vonesë sipas drejtorit Ahmet Morina ka ndodhur për shkak se kompania “ALA-CO” që e kishte fituar tenderin për spërkatje nga ajri nuk ka arritur të sigurojë leje për fluturim dhe aterrim nga Miniaeroporti Bujqësor i Banjës së Malishevës. Në Banjë në sipërfaqet e ish-ndërmarrjes bujqësore “Mirusha” ekziston një pistë e aeroportit bujqësor, e cila është shfrytëzuar para luftës për dezinsektim nga kjo ndërmarrje e të cilën kompania “ALA-CO” ka menduar ta shfrytëzojë tani për spërkatje nga ajri në funksion të luftimit të rriqrave. Sipas Morinës ky miniaeroport nuk është i regjistruar dhe sektori i Aviacionit Civil të Kosovës për këtë nuk e ka lejuar fluturimin nga aty.

Për rrjedhojë kompania e cila do të bëjë dezinsektimin e sipërfaqeve të zonave endemike nga ajri do të detyrohet të fluturojë nga Aeroporti i Prishtinës ose i Gjakovës.

Merret vesh se aktualisht kompania e ka në dispozicion një aeroplan, ndërkohë që pritet që me fillimin e fushatës së spërkatjes të sjellë edhe një tjetër. Pritet që spërkatja nga ajri do të fillojë sapo të ndalen shirat. Drejtori i Drejtorisë për Mbrojtje dhe Shpëtim, Ahmet Morina, ka konfirmuar se spërkatja nga ajri do të bëhet në ato zona ku ka mbaruar spërkatja selektive me pompa dore.