Berat Buzhala në një prononcim për “Zëri-n”, ka thënë se edhe pse është mjaftë vështirë në këto zgjedhje, sipas tij koalicioni më i mirë i mundshëm do të ishte Pardita Demokratike e Kosovës dhe Aleanca për Ardhmërinë e Kosovës.

“Për koalicionin më të mirë unë nuk mund të jap ndonjë mendim, nuk di cili është më i miri. Sepse kjo çështja e të keqes dhe të mirës është relative. Mirëpo, unë e shoh koalicionin e vetëm të mundshëm është PDK – AAK”, ka deklaruar Buzhala për “Zëri-n”.

Sipas tij, nëse kjo nuk arrihet brenda 30 dite, pra nëse PDK nuk arrinë që brenda 30 dite të formojë qeverinë, në bazë të kushtetutës, atëherë partia e dytë më e votuat duhet të vazhdoj dhe të bëj koalicione.

Sipas Buzhalës, krijimi i kolacionit PDK- AAK, është një koalicion shumë i vështirë, pasi që dihet se kreu i AAK-së, Ramush Haradinaj, ka shfaqur qartë qëndrimin e tij se dëshiron të ketë postin e kryeministrit.

“Kjo është çështje tepër e koklavitur. Unë mendoj që vetëm PDK dhe Nismë nuk mjafton, nuk dalin votat. PDK-ja definitivisht do të trokas në derën e AAK-së edhe nëse troket në derën e AAK-së, Ramushi moti e ka bërë të qartë që ai e kërkon postin e kryeministrit. Nëse AAK-ja futet në Qeveri me PDK-në, duke mos e marrë postin e kryeministrit, unë jam i sigurt se AAK do ta rrezikonte kalimin e pragut siç i ndodhi Pacollit. PDK-ja është një asi force politike e cila tregohet e pamëshirshme ndaj partnerëve edhe pra për fatin e Pacollit, tashmë do të lexojmë një histori. Mirëpo, tash nëse PDK-ja e sakrifikon postin e kryeministrit dhe ia jep Ramushit, kjo do të ishte një goditje e rëndë për PDK-në. Pra këto zgjedhje nuk janë të thjeshtësuara janë të komplikuara. Unë e konsideroj që do të jetë sfidë në vetvete krijimi i Qeverisë”, ka deklaruar Buzhala.

Ndërkaq sa i përket, arritjes së PDK-së në këto zgjedhje, Buzhala ka thënë se PDK ka treguar mjaft seriozitet pasi që ka arritur që ta mbrojë votën e vet që prej disa viteve rresht, por sipas tij dëshpëruese është se opozita nuk po arrinë që ta marrë pushtetin përkundër faktit se i ka 70 për qind të votave.

“PDK-ja e ka arritur atë rezultat që e ka arritur prej vitit 2000 e tutje, i ka 200 mijë vota e veta, por megjithatë e ka treguar një seriozitet si subjekt politik në menaxhimin e atyre votave dhe vazhdimisht përkundër faktit që ka pasur akuza e sulme është treguar e aftë që ti ruaj ato vota. Por, ajo çka është dëshpëruese është te opozita, e cila ndonëse i ka 70 për qind të votave, më tutje nuk po mund ta gjej mënyrën se si ta marrë pushtetin, por këto janë probleme të opozitës”, ka deklaruar Buzhala.

Kandidati i LDK-së për deputet, Muhamet Mustafa thotë se Kosova e dha një provim shumë të rëndësishëm duke demonstruar kapacitet dhe vullnet për të mbajtur zgjedhje brenda standardeve që lehtësojnë rrugëtimin në integrimet euro-atlantike.

“Për këtë duhet falënderuar votuesit po edhe akterët politik. Rezultatet nuk ishin te pritura, po fajin më të madh e ka opozita që nuk ka mundur të përçojë mesazhin adekuat tek votuesit dhe të bind ata se premtimet e partive në pushtet janë vijimësi e kësaj qeverisjeje dhe nuk janë kurrfarë zgjidhje për situatën e rëndë ekonomike e sociale”, ka shkruar Mustafa në Facebook.

Ai tutje ka shkruar se rezultatet dëshmojnë edhe se koalicioni në pushtet ka marrë shumë më pak vota se sa partitë opozitare.

“Ky duhet të jetë një start nisës. Tani duhet korrigjuar dobësitë nga e kaluara dhe shërbyer vendit me përkushtim, përgjegjësi dhe pa vonesë”, ka shkrua ai.

Koordinatorja Laura Pula, ka thënë se këto zgjedhje i kanë hapur rrugë Kosovës për integrime europiane. “Këto zgjedhje i kanë hapur rrugë Kosovës për integrime europiane”, ka thënë Pula në një intervistë për RTK-në. Ajo ka thënë se këto kanë qenë zgjedhjet me ankesa minimale.

“Nëse krahasojmë këto zgjedhje me ato lokale, puna është për t’u lavdëruar. Kemi një numër minimal të rasteve të paraqitura dje, janë 12-13 raste në të gjithë Republikën e Kosovës”, ka thënë ajo.

Megjithatë Pula ka thënë se do të hetohet çdo keqpërdorim apo ankesë.“Do të vazhdojmë të punojmë me tërë fuqinë tonë nëse do të ketë elemente të vepra penale edhe pas numërmit të votave“, ka thene Pula.

Jakup Krasniqi është i kënaqur me rezultate që ka arritur partia e tij NISMA për Kosovën. Ai thotë se kur merret parasysh se themelimi i saj është bërë tre muaj më parë, atëherë ky është rezultat i kënaqshëm.

“Jemi të kënaqur me rezultate, tash po presim se si do të mbyllet i gjithë procesi”, ka thënë për “Zëri-n”, Krasniqi.

Sa i përket një koalicioni të mundshëm me Partinë Demokratike të Kosovës, ai ka thënë se nuk e beson një gjë të tillë.

“Nuk besoj se do të arrijmë koalicion me PDK-n”, ka thënë Krasniqi.

Albin Kurti ka thënë se Lëvizja Vetëvendosje nuk është e kënaqur me rezultatin e zgjedhjeve, por sipas tij, VV-ja kurrë nuk ka qenë më e fortë si organizim dhe kurrë nuk ka pasur kaq shumë simpati nga qytetarët.
Për kreun e VV-së, fakti që PDK-ja ka dalë partia e parë është një lajm shumë i keq për Kosovën, sepse siç ka thënë ai doli e para partia e korrupsionit dhe e privatizimeve, partia e negociatave me Serbinë dhe e krimeve nga më të ndryshmet.
“Lëvizja Vetëvendosje do ta kundërshtojë fuqishëm këtë parti edhe në Kuvend edhe në çdo komunë. Ne u bëjmë thirrje të gjithë qytetarëve të Kosovës që të na bashkohen në ballafaqim me këtë parti që ka instaluar regjim në Kosovë”, ka thënë Kurti.
urti ka thënë se VV-në e kanë vlerësuar qytetarët si opozitën më parimore. Por si e përcakton Kushtetuta e vendit nëse partia fituese nuk mund t’i arrijë numrat në Kuvend për formimin e qeverisë së re.

Është spekuluar vazhdimisht se nëse brenda afatit 15 ditësh siç e përcakton Kushtetuta partia fituese nuk mund ta formojë qeverinë, atëherë mandati i kalon partisë së dytë fituese, në këtë rast LDK-së. Mirëpo Kushtetuta thotë kështu:

Neni 25, pika 4 – Nëse përbërja e propozuar e Qeverisë nuk merr shumicën e votave të nevojshme, Presidenti i Republikës së Kosovës, brenda dhjetë (10) ditësh emëron kandidatin tjetër sipas së njëjtës procedurë. Nëse as herën e dytë nuk zgjidhet Qeveria, atëherë Presidenti i Kosovës i shpall zgjedhjet, të cilat duhet të mbahen jo më vonë se dyzet (40) ditë nga dita e shpalljes së tyre. /Indeksonline/

Kryetari i Bashkimit Demokratik (BD) në Prizren, Zafir Berisha nuk ka arritë të ruajë votën e zgjedhjeve të nëntorit të vitit të kaluar. Ai në zgjedhjet lokale të vitit të kaluar si kandidat për kryetar të Prizrenuit, pat fituar mbi 9 mijë vota, ndërkaq në zgjedhjet e së dielës bashkë me Nismën për Kosovë në Prizren nuk ka arritw të ruajë këtë numër të votave.

Kryetari i Bashkimit Demokratik, Zafir Berisha në zgjedhjet nacionale tw 8 qershorit ka garuar në listën e Nismës për Kosovë.Ende nuk dihet se sa ka marrë vota si kandidat për deputet në nivel të Kosovës.

Sipas rezultateve të KQZ-së, Nisma në Prizren, bashkë me Bashimin Demokratik të Zafir Berishës ka arritë të fitojë 4.765 vota apo 8,43%

Berisha deri më tash nuk ka komentuar rezultatin e zgjedhjeve në Prizren. /PrizrenPress.com/

Partia Demokratike e Kosovës në vitin 2010, kur brenda e kishte fuqishëm në pozita Fatmir Limajn siguronte deri në mbi 13 mijë votues në qytetin e Malishevës. Sot ajo aty ka marr vetëm pak më shumë se 5600 vota.

Në këtë qytet, sikurse qeverisë me komunën, Nisma për Kosovën, subjekti më i ri politik kosovar që bashkë-drejtohet nga Fatmir Limaj e Jakup Krasniqi ka shumicën e votave, 41 % të tyre. Në numra kjo i bije që Nisma për Kosovën në Malishevë ka marrë mbi 8400 vota.

Në këtë komunë si parti e tretë radhitet LDK-ja me 19 % të votave, kurse partia e Albin Kurtit të dielën ka marrë veç pak më shumë se 1200 vota.

Partia Demokratike e Kosovës ka dalë fituese e zgjedhjeve të parakohshme parlamentare, por mbetet mjaftë sfiduese për të dhe liderin e saj Hashim Thaçi krijimi i qeverisë së re.

Me afërsisht 31 për qind të votave, PDK ka mposhtur partinë rivale Lidhjen Demokratike të Kosovës e cila ka arritur të siguroj afër 26 për qind të votave.

Mirëpo kjo distancë, nuk i siguron Thaçit dhe PDK-së komoditet në krijimin e koalicionit të ardhshëm qeveritar.

Andaj, tani mbetet që pas certifikimit të rezultatit të zgjedhjeve, Thaçi dhe PDK të kërkojnë një apo dy parti partnere për krijimin e koalicionit.

Partia e deritashme partnere e Thaçit, Aleanca Kosova e Re e afaristit Behxhet Pacolli ka dështuar të kalojë pragun zgjedhor prej pesë për qind, andaj Thaçi duhet t’u kthehet negociatave me Aleancën për Ardhmërinë e Kosovës të Ramush Haradinajt që ka siguruar afër 10 për qind të votave dhe partinë Nisma të Fatmir Limajt e cila ka mbledhur më pak se 6 për qind të votave.

Në koalicionin e ardhshëm do të jenë edhe pakicat si kategori kushtetuese.

Në secilin kombinim ku PDK do të ishte në qeveri, përjashtohet mundësia që aty të jetë edhe Lëvizja Vetëvendosje e cila ka dalë e treta në këto zgjedhje me afër 14 për qind. Koalicionin me PDK-në e ka përjashtuar në vazhdimësi edhe LDK-ja.

Pas votimeve dhe rezultateve preliminare, partitë politike, sidomos AAK dhe Nisma, akoma nuk janë deklaruar qartë rreth pozicioneve të tyre për koalicionet e mundshme dhe se janë në pritje të rezultatit final të zgjedhjeve dhe ndarjes së ulëseve në Kuvend.

Një nga parakushtet për zgjedhje plotësisht të suksesshme është pranimi i rezultatit. Nisur nga ky fakt, zëvendëskryetari i PDK-së, Kadri Veseli u ka bërë thirrje fillimisht të gjitha partive politike që të pranojnë rezultatin e zgjedhjeve.

“I ftojmë të gjitha partitë që solenisht ta pranojnë rezultatin e zgjedhjeve, rezultatin e votimeve nga qytetarët e Republikës së Kosovës që të mos ketë hidhërime dhe të mos ketë momente të këqija”, është shprehur Veseli.

Pas certifikimit të rezultatit, pritet të thirret edhe mbledhja konstituive e Kuvendit, ku partia fituese zgjedh kryetarin e ri të Parlamentit.

Më pas, presidentja Atifete Jahjaga në bashkëpunim me partinë fituese i jep mandatin kandidatit për kryeministër që në afatin prej 15 ditësh të prezantoj përbërjen e qeverisë së re për miratim para Parlamentit.

Qeveria, mund të formohet me minimum 61 vota të deputetëve, kështu që koalicioni është i pashmangshëm.

Në këtë pikë, Hashim Thaçi mund të përballet me kushtëzimet, qoftë të AAK-së apo partisë Nisma që të heq dorë nga posti i kryeministrit si kusht për arritjen e koalicionit.

Lideri i AAK-së Ramush Haradinaj, edhe në të kaluarën i kishte vënë kusht Thaçit postin e kryeministrit për arritjen e koalicionit me PDK-në.

Ndërkohë që lideri i partisë Nisma, Fatmir Limaj nuk e ka përjashtuar dhe as mohuar përfshirjen e tij në një koalicion të ardhshëm.

“Ne duhet të shohim certifikimin e rezultatit zgjedhor, se si do të shkoj, çfarë koalicione do të ndërtohen, kush do të ofroj koalicione dhe mbi bazën e kësaj ne do të japim përgjigjen”, ka thënë Limaj.

Ndërsa rezultatet janë thua se definitive dhe pritet që të shpërndahen edhe votat e partive që nuk e kaluan pragun tek ato që do të jenë pjesë e parlamentit, lideri i Lidhjes Demokratike të Kosovës, Isa Mustafa nuk ka bërë asnjë koment.

Gjatë fushatës, ai ishte i bindur në fitore. Por, këto zgjedhje i demantuan pritjet e tij dhe LDK-së, që paraqet zhgënjimin e radhës për liderin opozitar pas humbjes së garës për kryetar të Prishtinës gjatë zgjedhjeve lokale të fundvitit të kaluar.

Megjithatë, Isa Mustafa dhe LDK-ja mund ta kenë rastin tyre. Nëse partia fituese dështon që të formoj qeverinë, atëherë presidentja mandaton kandidatin për kryeministër nga partia e dytë e cila po ashtu merr një afat prej 15 ditëve që të propozojë përbërjen e qeverisë para parlamentit.

Në këtë frymë ka qenë të hënën një thirrje përmes rrjetit social Facebook e kryetarit të Prishtinës, i cili vjen nga radhët e Vetëvendosjes, Shpend Ahmeti, që partitë që dolën të katërtat dhe pestat të mos lidhin koalicion me PDK-në e Thaçit.

Sidoqoftë, gjërat pritet të qartësohen pas certifikimit të rezultatit, ngase dështimi eventual i formimit të qeverisë në dy tentativa do ta qonte Kosovën në zgjedhje të jashtëzakonshme. /REL/