Katërqind vjetori i lindjes së dramaturgut të njohur anglez, William Shakespeare, do të shënohet edhe në vend. Me rastin e këtij përvjetori, tragjedia “Hamleti” e teatrit shekspirian të Londrës, në regji të Dominik Dromgul dhe Bill Bakharst, do të shfaqet të martën në dy termine, nga ora 16:00 dhe 20:00, në Teatrin Kombëtar të Kosovës.

Dymbëdhjetë aktorë që tashmë kanë ardhur në Prishtinë, Xhon Dugal, Ladi Emeruva, Fibi Fildes, Miranda Foster, Naem Hayat, Berus Kan, Tom Lorens, Xhenifer Liong, Raviri Paratin, Methju Romein, Amanda Vilkin, Kit Bartlet pritet ta inskenojnë para publikut kryeqytetas tragjedinë e jetës së Hamletit, princit të Danimarkës, shkruar gjatë viteve të shekullit gjashtëmbëdhjetë nga Shakespeare.
Babai i Hamletit mbytet nga vëllai i tij Mbreti Klaud për të marrë në dorë pushtetin mbretëror. Pasi merr pushtetin ai po ashtu martohet me nënën e princit Hamlet, Gertruden. Mbreti Klaud të gjithë i bind se kjo ishte një vdekje natyrore. Por, pasi i lajmërohet fantazma e babait Hamletit, ai e sheh se kjo nuk ishte një vdekje natyrore, por mbreti Klaud e kishte vrarë babanë e tij me helm kur ai ishte duke fjetur .

“Në shfaqjen Hamleti, unë do të luajë princin e Danimarkës, ku zbulohet se babai i tij ka vdekur nga plagët e marra gjatë përleshjes me axhën e tij, dhe i cili vajton me të madhe ndaj asaj kësaj vrasje”, ka deklaruar gjatë konferencës së mbajtur për media njëri nga aktorët e shfaqjes, Naem Hayat që është me origjinë nga Pakistani.

“Globe Teatre Shekspir” në Londër, një nga teatrot më të mëdhenj të botës, më njëzet e tre prill të këtij viti shpalli turneun e tij më ambicioz me rastin e 450 vjetorit të lindjes së Shekspirit. Ky turne i jashtëzakonshëm në mbarë globin pritet të realizohet në një periudhë dy vjeçare. Por ky turne botëror i cili zhvillohet në kuadër të afër shekullit të pestë të lindjes së Shekspirit, e vendos Kosovën në listën e shteteve që “Globe Teater Shekspir” ka menduar të jetë prezent në skenën teatrore dhe shënon një moment të veçantë për Teatrin Kombëtar të Kosovës.

“Është ndoshta e tepërt të them se kjo është një ngjarje e rëndësishme kulturore për Kosovën. Shteti i Kosovës po bëhet pjesë integruese e performancave dhe ngjarjeve kulturore botërore, kështu që falë impenjimit dhe ndihmës së pakursyer të ministrit Krasniqi edhe Prishtina do të presë një nga trupat më të njohura në botë, që do të sjellë në skenë tragjedinë e Shekspirit, për të vazhduar turnin botëror edhe në dyqind e katër shtete të tjera”, citon KultPlus drejtorin e përgjithshëm të TKK-së, Valdet Avdiu.
Globe i Shekspirit është një rindërtim i përpiktë i përshtatur origjinal me gdhendje druri dhe koncept të hapur të skenës si në kohërat e Shekspirit. Sot ajo është një pjesë e gjallë dhe integrale e peizazhit teatrale të Londrës, duke ofruar Shekspirin dhe shkrimet e tij të guximshme në formatin botëror nën menaxhimin e drejtorit artistik Dominic Dromgoole.

“Jemi tejet të privilegjuar që na është dhënë mundësia të inskenojmë këtë shfaqje në Teatrin Kombëtar të Kosovës”, shtoi më tutje aktori nigerian Ladi Emeruva, i cili do të luajë në dramën “Hamleti”.
Teatri Globe i cili në Londër ndërlidhet me emrin Uilliam Shekspirit, është themeluar nga kompania teatrore e Shekspirit në vitin 1599, ndërsa gjatë një zjarri është djegur më 29 qershor të vitit 1613. Teatri modern i njohur nën emrin “Teatri shekspirian Globe” është hapur në vitin 1997 në afërsi të vendit ku ndodhej teatri i vjetër. Ai disponon me 1.380 ulëse dhe 700 vende për të qëndruar në këmbë.

Pasojat e luftës së fundit në Kosovë, ndikimi i teknologjisë në jetën e përditshme e deri tek opsionet e daljes nga izolimi që lidhet me liberalizimin e vizave, janë temat që shtjellohen në 33 skenaret që ka lexuar juria e Qendrës Kinematografike të Kosovës.

Vetëm 12 nga skenarët në kategorinë e filmave të shkurtër, dokumentarë dhe animacion, kanë marrë dritën e gjelbër për subvencionim me para të shtetit. QKK-ja të hënën ka publikuar listën me emrat e kineastëve që kanë përfituar nga konkursi i sivjetmë për përkrahje të projekteve. Disa prej anëtarëve të jurisë janë shprehur të kënaqur me nivelin e skenarëve në kategorinë e filmave të shkurtër e dokumentarë por jo edhe në animacion. Juria që ka bërë vlerësimin e skenarëve në këto tri kategori përbehet nga AlAlban Ukaj, Blerta Zeqiri, Florent Mehmeti, Kaltrina Krasniqi, Alban Muja, Imer Mushkolaj dhe Bardh Rugova (në mungesë). Lista e projekteve fituese filmike të metrazhit të gjatë do të bëhet publike më 29 qershor.

Në kategorinë e filmave të shkurtër kanë dalë shtatë projekte fituese. “Treni” nën regji të Selmin Beha, “Anestezioni” i Noar Sahitit, “Echo e heshtur” i Dren Zherkës, “Shok” me skenar të James Oliver Donughe, “ONN Side” i Valter Lucajt, “Cheers” i Norika Sefës dhe “Basti” i Ujkan Hysajt.

Fitues në kategorinë e filmave dokumentarë janë “Nakino” e Sami Mustafës, “Gratë nga Gjakova” nga Shkurta Dauti dhe Gazmend Bajri, “Chronicle of the last battle” me regji të Dardan Islamit dhe “Ushtarët paralel” i Mathieu Jouffre. E fitues i vetëm në kategorinë e animacionit është “N’kornizë” me regji të Gëzim Ramizit. E kjo e fundit, ka qenë kategoria që u ka shkaktuar më së shumti telashe jurisë për shkak të mungesës së kualitetit.

“Në përgjithësi kanë qenë skenarë të mirë. Jam i kënaqur me shumicën e skenarëve që kemi lexuar, megjithëse në animacion ka ende punë për t’u bërë meqë është disciplinë e re tek ne”, ka thënë Imer Mushkolaj, anëtar i jurisë, transmeton Koha.net.

Sipas tij, skenarët që ka lexuar juria gërshetojnë tema të ndryshme.

“Janë trajtuar pasojat e luftës siç është përshembull dhunimi i femrave. Po ashtu ka edhe tema për ndikimin e teknologjisë në jetën bashkëkohore e deri te dalja nga izolomi”, ka shpjeguar Mushkolaj.

Regjisori Florent Mehmeti, po ashtu ka thënë se në kategorinë e animacionit nuk ka pasur kualitet të mjaftueshëm.
“Në animacion është vërejtur mungesë e kualitetit, ndërsa në dy kategoritë tjera kanë qenë më të mirë. Por në përgjithësi, mendoj se ka qenë kualitet i mirë”, ka thënë Mehmeti, tek ka folur për disa ide që janë trajtuar në skenarë.

“Ka pasur ide me kohë të kaluar që s’është trajtuar më parë, për shembull viteve ’40, ’25. Tema e luftës ka vazhduar të sillet në shumicën e skenarëve por në kënde të ndryshme. Po ashtu ka pasur tema sociale dhe deri te ato më subjektive e personale”, ka thënë ai.

Në konkursin e sivjetmë të QKK-së nuk janë marrë parasysh ndryshimet që janë përcaktuar me Projektligjin për kinematografi që tashmë ka kaluar në Qeveri, por ende nuk është miratuar nga Kuvendi i Kosovës. Sipas këtij projektligji, shtetit i lejohet të financojë prodhimin e një filmi të metrazhit të gjatë dhe atij dokumentar deri në 70 për qind. Me ligjin aktual, me buxhet shtetëror një film financohet deri në 51 për qind. E shuma me të cilën do të përkrahen 12 projektet fituese në tri kategori nuk është zbuluar ende.

“Do të vendos Këshilli Drejtues në bazë të vendimit të jurisë dhe këshilltarit financiar të QKK-së”, ka thënë Arben Zharku, drejtor i Qendrës Kinematografike të Kosovës.