Njëri nga avokatët më të mirë në botë për krime të luftës, Michaell O’Relly ka thënë për Radio Dukagjinin se raporti i prokurorit Williamson bazuar në pretendimet e ngritura të Dick Martyt, nuk pritet të vërtetoi akuzat për trafikim organesh në Kosovë.

Ai ka thënë se përderisa ekipi i Williamson nuk gjeti prova për trafikim organesh, ndryshoi aktakuzën duke u kthyer në krime të luftës.

Por ai ka tërhequr vërejtjen se çdo dokument i natyrës së tillë do t’i sjell dëme Kosovës në imazhin ndërkombëtarë.

“Nuk jam i befasuar se nuk ka pasur trafikim të organeve sepse shumë herë është thënë se ka trafikim dhe kjo ka qenë absurde, sepse nuk është bazuar në asgjë. Por ajo çka është e pritshme se do të ketë akuza për veprimet individuale të njerëzve gjatë luftës”, ka theksuar avokati O’Relly

Avokati i cili ka udhëhequr ekipin mbrojtës të Ramush Hardinajt në Hagë, vlerësoi se megjithatë çka do që thotë raporti ai do t’i sjell dëme Kosovës në rrafshin ndërkombëtarë.

“Është e vështirë të dijë saktësisht se çka është shkruar në raport, pasi ende nuk e kemi parë përmbajtjen e tij. E kuptoi që ky dokument do të konkludoi se nuk ka pasur trafikim të organeve, por çdo raport i natyrës së tillë do t’i sjell dëme të mëdha Kosovës. Duhet të presim se çka do të ndodh por këto zhvillime nuk janë të mirëseardhura”, ka pohuar O’Relly.

Ai ka kritikuar ashpër qasjen e faktorit ndërkombëtarë që për gjykimet individuale të njerëzve të themelohen gjykata special.

“Dua të them që veprimet individuale ndaj njerëzve në këtë rast krimet ndaj serbëve është dashur të gjykohen në Kosovë në këtë rast nga EULEX-i dhe jo kjo çështje të marr përmasa ndërkombëtare, pra që të kemi një gjykim ndërkombëtarë. Kjo më shumë është bërë politikisht që ka nisura nga akuzat se ka pasur trafikim organeve në Kosovë”, ka potencuar O’Relly.

Prokurori Clint Williamson të hënën dhe të martën ka qëndruar në Prishtinë dhe Beograd ku është takuar me autoritet e lartat të të dyja vendeve, përjashtuar kryeministrin e Kosovës në detyrë, Hashim Thaçi.

Ai u ka bërë të ditur palëve se raportin më të gjeturat e tij do ta bëjë publike gjatë javës së ardhshme në Bruksel.

Zyrtarë të Lëvizjes Vetëvendosje, nuk mendojnë të ndryshojnë qëndrimin sa i përket rivotimit eventual për propozimin e Grupit parlamentar LDK-AAK-Nisma për të zgjedhur sërish kryetar Isa Mustafën. Ata do të do të abstenojnë nëse paraprakisht nuk arrihet ndonjë marrëveshje.

Kështu është shprehur Erzen Vraniqi, këshilltar për media i Lëvizjes Vetëvendosje, i cili thotë se pozicioni i subjektit të tij nuk ndryshon nga ai që ka mbajtur në seancën e 17 korrikut në raport me votimin e propozimit të Isa Mustafës për kryeparlamentar, në rast se paraprakisht nuk arrihet ndonjë marrëveshje. Sipas tij, Vetëvendosje nuk do të ndryshojë pozicion.

“Do të veprojmë njëjtë siç vepruam në seancën konstituive të Kuvendit, më 17 korrik, nëse paraprakisht nuk kemi ndonjë marrëveshje me koalicionin LDK-AAK-Nisma”, është shprehur Vraniqi për Botapress.

Sekretari i përgjithshëm i Lëvizjes për Bashkim (LB), Valon Murati, ka vlerësuar se as PDK-ja me parterët e saj e as koalicioni LDK-AAK-Nisma nuk mund të garantojnë qeveri stabile dhe të qëndrueshme.

Në këtë intervistë për “Epokën e re”, Murati ka deklaruar se ky ngërç politik i krijuar pas zgjedhjeve të 8 qershorit mund të tejkalohet vetëm me zgjedhje të reja parlamentare.

“Në situatën në të cilën jemi futur si vend pas zgjedhjeve të 8 qershorit, dhe pa marrë parasysh vendimin e radhës të Gjykatës Kushtetuese, apo të vendimeve të tjera të saj, nëse paragjykojmë se do të vazhdojë saga drejtuar kësaj gjykate, kam bindjen e thellë se e vetmja zgjidhje nga kjo situatë do të ishin zgjedhjet e reja të përgjithshme”, ka thënë Murati. Në këtë kontekst, Murati i ka sugjeruar presidentes së Kosovës, Atifete Jahjaga, që në konsultim me partitë politike, të merret vesh për organizimin e zgjedhjeve të reja parlamentare.

Madje Murati ka thënë se presidentja Jahjaga duhet të dalë publikisht dhe të rekomandojë zgjedhje të reja për Kosovën.

“Në këtë situatë presidentja e vendit, në konsultim me partitë politike, do të duhej sa më shpejt të merreshin vesh për organizimin e zgjedhjeve të reja të përgjithshme. Madje mendoj se presidentja nuk do të duhej të hezitonte që edhe publikisht të rekomandonte zgjedhje të reja për të dalë nga ky ngërç politik në të cilin jemi futur. Përndryshe, zgjedhjet e reja do ta zgjidhnin lëmshin e të parit, sidomos në elektoratin shqiptar, duke qenë se në to do të kishim pak a shumë tri grupe: i pari koalicioni PDK-PD-LB, të cilit eventualisht do të mund t’i bashkëngjitej edhe AKR-ja, koalicionin LDK-AAK-Nisma dhe Lëvizjen Vetëvendosje!”, është shprehur Murati, duke shtuar se, nëse Kosova shkon në zgjedhje, LB-ja do ta vazhdojë partneritetin me PDK-në.

“Sa i përket LB-së, edhe në zgjedhjet e ardhshme besoj se do të vazhdohet koalicioni ekzistues, sepse nuk ka ndryshuar ndonjë rrethanë që ne të ndryshojmë qëndrim në këtë drejtim”, ka thënë Murati.

Kosova po pret që të marrë raportin e vlerësimit të Komisionit Evropian për përmbushjen e kritereve që kanë të bëjnë me liberalizimin e vizave. Raporti, sipas njohësve të integrimeve evropiane nuk pritet që t’i mundësojë Kosovës liberalizimin e vizave para vitit 2015.

Sipas tyre, shkak i kësaj është sepse Kosova ka ngecur në pavarësimin e sistemit gjyqësor dhe prokurorisë si një ndër pikat më kryesore të udhërrëfyesit, duke i shtuar këtu edhe migrimin e paligjshëm të kosovarëve që kanë ‘vërshuar’ vendet e Evropës në kërkim të lejes se qëndrimit në BE.

Në pritje të ardhjes së raportit të vlerësimit, ministri i Brendshëm në detyrë Bajram Rexhepi, të mërkurën kishte paralajmëruar një konferencë për media lidhur me këtë ngjarje, por në ndërkohë e ka anuluar konferencën përmes një komunikate. /Tribuna/